بنوں میں مدارس کی رجسٹریشن، نگرانی اور احتساب کا مطالبہ تیز
ضلع بنوں کے شہریوں نے مطالبہ کیا ہے کہ دینی مدارس کو بھی دیگر تعلیمی اداروں کی طرح رجسٹرڈ کیا جائے، سیاسی اثر و رسوخ سے آزاد کر کے قانون کے دائرے میں لایا جائے اور سرکاری کمیٹی ان کی رجسٹریشن کی جانچ کرے۔
ضلع بنوں میں دینی مدارس کی رجسٹریشن، نگرانی اور احتساب کا مطالبہ روز بروز شدت اختیار کرتا جا رہا ہے۔ مقامی شہریوں کی جانب سے یہ آواز بلند کی جا رہی ہے کہ مدارس کو بھی ملک کے دیگر تعلیمی اداروں کی طرح ایک واضح نظام کے تحت رجسٹرڈ کیا جائے اور انہیں قانون کے دائرے میں لایا جائے تاکہ تعلیمی معیار اور شفافیت کو یقینی بنایا جا سکے۔
شہریوں کا کہنا ہے کہ اب وقت آ گیا ہے کہ دینی مدارس کو بھی باقی تعلیمی اداروں کے ساتھ ایک ہی نظام تعلیم کا حصہ بنایا جائے۔ ان کے مطابق ملک بھر کے تعلیمی ادارے مقررہ قواعد و ضوابط کے تحت چل رہے ہیں، اس لیے مدارس کو بھی اسی طرز پر شفاف اور باقاعدہ فریم ورک میں لانا ضروری ہے۔
مقامی افراد نے مزید مطالبہ کیا کہ مدارس سیاست کے بجائے معیاری تعلیم پر توجہ دیں اور انہیں سیاسی اثر و رسوخ سے آزاد کیا جائے۔ ان کا کہنا ہے کہ تعلیمی اداروں کا بنیادی مقصد علم کی فراہمی ہے، اور اس مقصد کے حصول کے لیے مدارس کو بھی قانونی تقاضوں پر پورا اترنا چاہیے۔
شہریوں نے تجویز دی ہے کہ ایک سرکاری کمیٹی تشکیل دی جائے جو مدارس کی رجسٹریشن کی جانچ کرے اور یہ یقینی بنائے کہ تمام ادارے مقررہ ضوابط کے مطابق کام کر رہے ہیں۔ ان کے مطابق اس اقدام سے نہ صرف تعلیمی معیار بہتر ہو گا بلکہ عوامی اعتماد میں بھی اضافہ ہو گا۔
یاد رہے کہ ملک بھر میں تعلیمی اداروں کی رجسٹریشن اور نگرانی کے حوالے سے بحث کئی بار سامنے آ چکی ہے، اور اب بنوں کے عوام کی جانب سے اٹھائی گئی یہ آواز اس مطالبے کو مزید تقویت دے رہی ہے کہ مدارس کو بھی جدید تعلیمی نظام کے ساتھ ہم آہنگ کیا جائے۔
