لاہور ٹریفک پولیس کی تیز رفتار ریسنگ اور ڈرفٹنگ کے خلاف کارروائی، دو گاڑیاں قبضے میں

لاہور ٹریفک پولیس نے خطرناک ڈرائیونگ اور تیز رفتار ریسنگ کے خلاف کارروائی کرتے ہوئے سی بی ڈی روڈ پر ایک دوسرے کے ساتھ ریس لگانے والی دو گاڑیوں کو قبضے میں لے لیا ہے۔ ڈی ایس پی اشفاق احمد کے مطابق ایک پراڈو اور ایک کرولا میں سوار ڈرائیورز تیز رفتاری سے ریس لگا رہے تھے، اور اطلاع ملنے پر ٹریفک پولیس نے ناکے پر دونوں گاڑیوں کو روک کر ڈرائیورز کو حراست میں لے لیا۔

پولیس کے مطابق گرفتار ڈرائیورز کی شناخت رجب شہزاد اور علی عاصم کے نام سے ہوئی ہے۔ دونوں کے خلاف تھانہ فیکٹری ایریا میں مقدمہ درج کر کے انہیں گاڑیوں سمیت حوالات منتقل کر دیا گیا ہے۔

ترجمان ٹریفک پولیس نے بتایا کہ شہر بھر میں ڈرفٹنگ اور تیز رفتاری کرنے والوں کے خلاف کریک ڈاؤن جاری ہے اور اس سلسلے میں مزید کارروائیاں بھی کی جا رہی ہیں۔

سی ٹی او لاہور سید عبدالرحیم شیرازی کا کہنا ہے کہ شہریوں کی جان و مال کا تحفظ محکمے کی اولین ترجیح ہے، اور خطرناک ڈرائیونگ کرنے والوں کے خلاف بلاامتیاز کارروائی جاری رہے گی۔ انہوں نے شہریوں پر زور دیا کہ وہ خود بھی ٹریفک قوانین کی پاسداری کریں تاکہ حادثات سے بچا جا سکے۔

واضح رہے کہ حالیہ عرصے میں لاہور کی اہم سڑکوں پر رات کے اوقات میں ریسنگ اور ڈرفٹنگ کے واقعات میں اضافہ دیکھا گیا ہے، جس سے عام شہریوں کی جان کو خطرات لاحق ہوتے ہیں۔ ٹریفک پولیس کی اس کارروائی کو شہریوں کی سلامتی کے لیے ایک مثبت اقدام قرار دیا جا رہا ہے۔