خیبرپختونخوا میں بلدیاتی انتخابات ملتوی، لوکل کونسل ایسوسی ایشن آئینی عدالت جانے کا فیصلہ

خیبرپختونخوا میں بلدیاتی انتخابات ملتوی کرنے کے فیصلے کے خلاف لوکل کونسل ایسوسی ایشن نے آئینی عدالت سے رجوع کرنے کا فیصلہ کیا ہے۔ ایسوسی ایشن کے چیئرمین حمایت اللہ مایار نے کہا ہے کہ وکلا سے مشاورت مکمل کرلی گئی ہے اور جلد ہی یہ فیصلہ عدالت میں چیلنج کیا جائے گا۔

انہوں نے کہا کہ الیکشن کمیشن نے صوبے کے 12 اضلاع میں ایمرجنسی نافذ ہونے اور آرٹیکل 140(اے) معطل ہونے کی بنیاد پر بلدیاتی انتخابات ملتوی کیے ہیں، تاہم یہ استدلال آئین و قانون کے تقاضوں کے مطابق نہیں۔ ان کا موقف ہے کہ آرٹیکل 140(اے) کی معطلی کا مطلب یہ ہرگز نہیں کہ مقامی حکومتوں کے انتخابات ہی روک دیے جائیں۔

حمایت اللہ مایار نے تاریخی حوالہ دیتے ہوئے کہا کہ ماضی میں جب ملک میں مارشل لا نافذ تھا اور آئین معطل تھا، تب بھی بلدیاتی انتخابات منعقد ہوئے۔ انہوں نے ایوب خان، جنرل ضیاء الحق اور جنرل مشرف کے ادوار کا ذکر کرتے ہوئے کہا کہ ان دور میں بھی مقامی سطح پر انتخابات کا سلسلہ جاری رہا۔

ان کا کہنا تھا کہ سیاسی حکومتوں کے دور میں بلدیاتی انتخابات سے گریز کی روایت پروان چڑھی ہے۔ انہوں نے الزام لگایا کہ پیپلزپارٹی اور مسلم لیگ (ن) جمہوری جماعتیں ہونے کے باوجود بلدیاتی الیکشن کرانے میں سنجیدگی نہیں دکھاتیں۔ انہوں نے مثال دی کہ پنجاب میں چھ سال سے زائد عرصہ گزرنے کے باوجود بلدیاتی انتخابات نہیں ہوئے، سندھ میں مقامی حکومتوں کی مدت میں توسیع کی گئی، بلوچستان میں بھی انتخابات مؤخر ہیں اور اب خیبرپختونخوا میں بھی یہ عمل ملتوی کردیا گیا ہے۔

لوکل کونسل ایسوسی ایشن کی جانب سے یہ اقدام ایسے وقت میں سامنے آیا ہے جب صوبے میں مقامی حکومتوں کے نظام کو فعال بنانے کے حوالے سے بحث جاری ہے۔ ماہرین کا خیال ہے کہ بلدیاتی اداروں کی عدم موجودگی میں عوامی مسائل کے حل میں تاخیر ہوتی ہے اور ترقیاتی کاموں کی نگرانی متاثر ہوتی ہے۔

الیکشن کمیشن کا مؤقف ہے کہ ایمرجنسی کی صورتحال میں آئینی شق کے معطل ہونے کے باعث انتخابات کرانا قانونی طور پر ممکن نہیں، جبکہ ایسوسی ایشن اس مؤقف کو چیلنج کرتے ہوئے عدالت سے رجوع ہوگی۔ اس معاملے پر آئینی عدالت کا فیصلہ آئندہ کے بلدیاتی نظام کے لیے اہم سمجھا جا رہا ہے۔