خیبر پختونخوا میں ٹرانسفارمر بیسڈ لوڈ مینجمنٹ سسٹم متعارف کرانے کا فیصلہ

وفاقی حکومت نے خیبر پختونخوا میں ٹرانسفارمر بیسڈ لوڈ مینجمنٹ سسٹم متعارف کرانے کا فیصلہ کیا ہے۔ یہ فیصلہ وزیراعظم شہباز شریف کی ہدایت پر صوبے کے توانائی مسائل کے پائیدار حل کے لیے منعقدہ ایک اہم مشاورتی اجلاس میں کیا گیا، جس میں وفاقی اور صوبائی قیادت نے شرکت کی۔

اجلاس میں وفاقی وزیر توانائی اویس احمد لغاری، وفاقی وزیر پیٹرولیم، گورنر خیبر پختونخوا فیصل کریم کنڈی اور چیف سیکرٹری خیبر پختونخوا موجود تھے۔ گورنر فیصل کریم کنڈی نے صوبے میں طویل لوڈشیڈنگ کا مسئلہ وفاقی حکومت کے سامنے اٹھایا اور زیادہ نقصانات والے علاقوں میں بھی لوڈشیڈنگ کا دورانیہ کم سے کم رکھنے پر زور دیا۔

نئے نظام کے تحت پورے فیڈر کے بجائے انفرادی ٹرانسفارمرز کی سطح پر لوڈ مینجمنٹ کی جائے گی۔ اس کا مقصد یہ ہے کہ بجلی کے بل باقاعدگی سے ادا کرنے والے صارفین کو لوڈشیڈنگ میں نمایاں ریلیف فراہم کیا جائے، جبکہ زیادہ نقصانات والے علاقوں میں بھی بجلی کی فراہمی کو بہتر بنایا جائے۔

وفاقی وزیر توانائی اویس احمد لغاری نے گورنر خیبر پختونخوا کو یقین دہانی کرائی کہ زیادہ نقصانات والے علاقوں میں لوڈشیڈنگ کم کرنے کے لیے فوری اور مؤثر اقدامات کیے جائیں گے۔ اجلاس میں وفاقی حکومت اور صوبائی قیادت نے خیبر پختونخوا کے توانی مسائل کے حل اور عوام کو فوری ریلیف فراہم کرنے کے لیے مشترکہ اقدامات پر اتفاق کیا۔

ماہرین کے مطابق ٹرانسفارمر بیسڈ لوڈ مینجمنٹ سسٹم سے بجلی کی تقسیم میں شفافیت بڑھے گی اور وہ صارفین جو وقت پر بل ادا کرتے ہیں، انہیں غیر ضروری لوڈشیڈنگ کا سامنا نہیں کرنا پڑے گا۔ یہ اقدام صوبے میں توانائی کے بحران کو کم کرنے اور صارفین کے اعتماد کو بحال کرنے کی سمت ایک اہم پیش رفت قرار دیا جا رہا ہے۔