لکی مروت میں پولیس کارروائی: خودکش بمبار سمیت دو دہشت گرد ہلاک، ایک زخمی فرار

خیبرپختونخوا کے ضلع لکی مروت میں پولیس نے ایک کارروائی کے دوران خودکش بمبار سمیت دو دہشت گردوں کو ہلاک کر دیا ہے، جبکہ ایک زخمی دہشت گرد فرار ہونے میں کامیاب رہا۔ پولیس کے مطابق یہ کارروائی گنڈی چوک کے مقام پر کی گئی، جہاں مشکوک افراد کی موجودگی کی اطلاع ملنے پر مقامی پولیس کی نفری فوری طور پر موقع پر پہنچ گئی۔

پولیس ذرائع کے مطابق کالے شیشوں والی ایک کار گنڈی چوک پر دیکھی گئی تھی، اور پولیس کو دیکھتے ہی کار میں سوار مشتبہ افراد نے فرار ہونے کی کوشش کرتے ہوئے پولیس پر فائرنگ شروع کر دی۔ پولیس پارٹی نے بھرپور جوابی کارروائی کی، جس کے نتیجے میں کار میں سوار خودکش بمبار سمیت دو دہشت گرد موقع پر ہلاک ہو گئے۔

کارروائی کے دوران ایک زخمی دہشت گرد فرار ہونے میں کامیاب رہا، جس کی تلاش کے لیے علاقے میں سرچ آپریشن جاری ہے۔ پولیس نے جائے وقوع سے اسلحہ، کالعدم تحریک طالبان پاکستان (ٹی ٹی پی) کا جھنڈا، خواتین کے برقعے اور دیگر مشکوک اشیا برآمد کر لی ہیں۔

ابتدائی معلومات کے مطابق برآمد ہونے والے سامان کی نوعیت کو مدنظر رکھتے ہوئے دہشت گردوں کے ممکنہ عزائم کی تحقیقات کی جا رہی ہیں۔ پولیس کا قیاس ہے کہ یہ گروہ کسی بڑی تخریب کاری کی منصوبہ بندی کر رہا تھا، جسے بروقت کارروائی کے ذریعے ناکام بنا دیا گیا۔

واقعے کے بعد پولیس اور سی ٹی ڈی کی بھاری نفری موقع پر موجود ہے اور علاقے میں سرچ آپریشن اور نگرانی کا عمل جاری ہے۔ ہلاک ہونے والے دہشت گردوں کی لاشوں کو تحویل میں لے کر شناخت کا عمل شروع کر دیا گیا ہے۔

ادھر انسپکٹر جنرل پولیس خیبرپختونخوا ذوالفقار حمید نے لکی مروت پولیس کی کارروائی کو سراہتے ہوئے کہا کہ عوام کی جان و مال کے تحفظ کے لیے خدمات انجام دینے والے پولیس اہلکار قوم کے ہیروز ہیں۔ انہوں نے کہا کہ آخری دہشت گرد کے خاتمے تک جدوجہد جاری رہے گی۔

یاد رہے کہ خیبرپختونخوا کے مختلف اضلاع میں حالیہ عرصے میں سکیورٹی فورسز کی جانب سے دہشت گردوں کے خلاف کارروائیاں جاری ہیں، اور صوبائی پولیس نے عوام سے اپیل کی ہے کہ وہ کسی بھی مشکوک سرگرمی کی اطلاع فوری طور پر متعلقہ حکام کو دیں۔