بلوچستان: سیکیورٹی فورسز کا آپریشن، 9 دہشت گرد ہلاک
مستونگ کے علاقے کنک وادی میں سیکیورٹی فورسز نے کارروائی کرتے ہوئے 9 دہشت گردوں کو ہلاک کر دیا، دہشت گردوں کے پاس سے اسلحہ اور موٹر سائیکلیں برآمد ہوئیں۔
یہ خبر اور ہر اہم خبر سب سے پہلے واٹس ایپ پر پائیںaround.pk اردو خبریں چینل — مفت، بغیر سپیم فالو کریں
بلوچستان کے ضلع مستونگ کے علاقے کنک وادی میں سیکیورٹی فورسز نے آپریشن ردالفتنہ 3 کے تحت دہشت گردوں کے خلاف بھرپور کارروائی کی ہے۔ سیکیورٹی ذرائع کے مطابق فتنہ الخوارج کے دہشت گردوں نے چوکی پر حملے کی کوشش کی جسے بروقت کارروائی کر کے ناکام بنا دیا گیا۔
ذرائع کا کہنا ہے کہ سیکیورٹی فورسز کی فوری اور مؤثر جوابی کارروائی میں دو دہشت گرد موقع پر ہی مارے گئے۔
سیکیورٹی فورسز نے بعد ازاں دہشت گردوں کی تلاش اور ان کے ساتھیوں کے تعاقب میں کارروائی جاری رکھی جس کے نتیجے میں مزید سات دہشت گرد ہلاک ہوئے۔
آپریشن کے دوران دہشت گردوں کے قبضے سے تین موٹر سائیکلیں، بھاری مقدار میں اسلحہ اور گولہ بارود برآمد ہوا ہے۔
سیکیورٹی ذرائع نے بتایا کہ شدید فائرنگ کے تبادلے میں سیکیورٹی فورسز کا ایک جوان زخمی ہوا جسے فوری طور پر اسپتال منتقل کر دیا گیا ہے۔
سیکیورٹی فورسز کے مطابق بلوچستان سے آخری دہشت گرد کے خاتمے تک آپریشن جاری رکھا جائے گا۔
