ایران کا امریکا پر جھوٹا بیانیہ گھڑنے کا الزام

ایرانی وزارت خارجہ کے ترجمان اسماعیل بقائی نے امریکا پر الزام عائد کیا ہے کہ وہ ایران کے خلاف اپنی فوجی کارروائیوں کی ذمہ داری سے بچنے اور حقائق کو توڑ مروڑ کر پیش کرنے کے لیے نیا بیانیہ گھڑ رہا ہے۔ انہوں نے کہا کہ امریکی حکام اپنی ناکامیوں پر پردہ ڈالنے کے لیے اس بیانیے کو استعمال کر رہے ہیں۔

بقائی کے مطابق یہ دعویٰ بالکل بے بنیاد ہے کہ ایران نے 1979 کے انقلاب کے ذریعے امریکا کے ساتھ محاذ آرائی کا آغاز کیا تھا۔ ان کا کہنا تھا کہ ایرانی انقلاب درحقیقت قومی خودمختاری، آزادی اور انسانی وقار کی بحالی کی ایک جدوجہد تھی، جس کا مقصد کسی ملک کے خلاف محاذ آرائی نہیں تھا۔

ایرانی ترجمان نے کہا کہ ایرانی عوام 1953 میں سی آئی اے کی حمایت سے کیے گئے بغاوت کو اب بھی نہیں بھولے اور امریکا اپنی پالیسیوں اور اقدامات کی تاریخ سے انکار نہیں کر سکتا۔ ان کے بقول واشنگٹن نے دو مرتبہ مذاکرات کے دوران ایران کے خلاف بلااشتعال فوجی کارروائی کی، جس میں ملک کے سپریم لیڈر اور اعلیٰ حکام کو نشانہ بنایا گیا، خواتین اور بچے متاثر ہوئے جبکہ اہم بنیادی ڈھانچے کو بھی نقصان پہنچایا گیا۔

اسماعیل بقائی نے مزید کہا کہ امریکی انتظامیہ اس وقت فوجی اور سیاسی دونوں محاذوں پر مشکلات کا شکار ہے۔ ان کے مطابق واشنگٹن جنگ شروع کرنے کی ذمہ داری قبول کرنے کے بجائے اپنی کامیابیوں کا تاثر دے کر ناکامی کو چھپانے کی کوشش کر رہا ہے۔

ان کا کہنا تھا کہ امریکی سیاسی نظام کی اعلیٰ سطح پر بھی یہ اعتراف کیا گیا ہے کہ ایران کے خلاف جنگ انتخابی شکست کی ایک بنیادی وجہ بنی۔ ایرانی ترجمان کے مطابق امریکا طویل عرصے سے ایرانی قوم کے خلاف دشمنی کو ہوا دینے اور فوجی جارحیت شروع کرنے کا ذمہ دار رہا ہے۔

واضح رہے کہ یہ بیان ایسے وقت میں سامنے آیا ہے جب خطے میں سمندری سلامتی اور تیل کی ترسیل کے راستوں سے متعلق کشیدگی جاری ہے اور آبنائے ہرمز میں تجارتی جہازوں کے تحفظ کے لیے فوجی گشت میں اضافہ دیکھا گیا ہے۔

یہ بیان دونوں ملکوں کے درمیان جاری سفارتی اور سیاسی اختلافات کے تناظر میں اہم سمجھا جا رہا ہے، جہاں ایران بار بار امریکا پر ماضی کی مداخلت اور موجودہ پالیسیوں کا الزام عائد کرتا رہا ہے۔