امریکا میں فضائی بحران: چھ ہزار سے زائد پروازیں منسوخ، ہزاروں مسافر پھنس گئے

امریکا میں فضائی سفر کا بحران شدت اختیار کر گیا ہے۔ فضائی حدود کھلنے کے باوجود ایئرلائنز ہفتے کے روز بھی اپنی پروازیں معمول کے مطابق بحال کرنے میں ناکام رہیں، جس کے نتیجے میں ہزاروں مسافر مختلف ہوائی اڈوں پر پھنسے ہوئے ہیں اور انہیں غیر یقینی صورتحال کا سامنا ہے۔

فلائٹ ٹریکنگ سروس فلائٹ اویئر کے اعداد و شمار کے مطابق ہفتے کے روز امریکا آنے اور یہاں سے روانہ ہونے والی 6,228 پروازیں منسوخ جبکہ 7,542 پروازیں تاخیر کا شکار ہوئیں۔ یہ تعداد امریکی فیڈرل ایوی ایشن اتھارٹی کی جانب سے پہلے لگائے گئے اندازوں سے بھی زیادہ ہے۔ عالمی سطح پر مجموعی طور پر 6,843 پروازیں منسوخ اور تقریباً بیس ہزار پروازوں میں تاخیر ریکارڈ کی گئی۔

سب سے زیادہ متاثر ہونے والے ہوائی اڈوں میں ڈیلاس، ہیوسٹن، شکاگو، اٹلانٹا اور نیویارک شامل ہیں۔ شکاگو کے اوہیئر ایئرپورٹ پر 559 سے زائد پروازیں منسوخ ہوئیں، جبکہ اٹلانٹا کے ہارٹس فیلڈ جیکسن ایئرپورٹ پر 479 پروازیں منسوخ کی گئیں۔ ڈیلاس فورٹ ورتھ ایئرپورٹ پر بھی سیکڑوں پروازیں متاثر ہوئیں اور متعدد مسافروں کو رات ہوائی اڈے پر گزارنی پڑی۔

فضائی کمپنیوں میں جیٹ بلیو سب سے زیادہ متاثر ہوئی، جس کی تقریباً 45 فیصد پروازیں منسوخ ہوئیں، جبکہ امریکن ایئرلائنز، یونائیٹڈ اور ڈیلٹا نے اپنے شیڈول کی تقریباً ایک چوتھائی پروازیں منسوخ کر دیں۔ متاثرہ مسافروں کو اضافی فیس کے بغیر سفر کی نئی تاریخیں دینے کی سہولت فراہم کی جا رہی ہے تاکہ ان کی دشواری کم کی جا سکے۔

امریکی محکمہ ٹرانسپورٹ کے مطابق فضائی حدود کھلی ہیں اور پروازوں کی روانگی محفوظ طریقے سے جاری ہے، تاہم طیاروں اور عملے کی دوبارہ تعیناتی کے ساتھ ساتھ مسافروں کی بکنگ کے مسائل کی وجہ سے آپریشن معمول پر آنے میں وقت لگ رہا ہے۔ حکام کو توقع ہے کہ اتوار کی رات تک فضائی کمپنیوں کا مکمل شیڈول بحال ہو سکے گا۔

ادھر مسافروں کو ہدایت کی گئی ہے کہ وہ مزید پروازوں کی منسوخی اور تاخیر کے لیے تیار رہیں اور روانگی سے قبل اپنی پرواز کی حیثیت آن لائن چیک کریں۔ ماہرین کے مطابق ایسی صورتحال میں ایئرلائنز کو عملے کی ترتیب نو اور بکنگ کے نظام کو از سرِ نو ہم آہنگ کرنے میں کئی دن لگ سکتے ہیں۔