آبنائے ہرمز میں بارودی سرنگوں سے ٹکرا کر تین آئل ٹینکروں میں آگ بھڑک اٹھی

آبنائے ہرمز میں تین آئل ٹینکروں کے بارودی سرنگوں سے ٹکرانے کے بعد ان میں زوردار دھماکے ہوئے اور آگ بھڑک اٹھی۔ ایرانی بحریہ اور پاسدارانِ انقلاب کی بحری فورس نے اس واقعے کی تصدیق کرتے ہوئے دعویٰ کیا ہے کہ متاثرہ جہازوں نے ایران کی جانب سے ممنوع قرار دیے گئے بحری راستوں سے گزرنے کی کوشش کی تھی۔

ایرانی حکام کے مطابق پہلے آئل ٹینکر کو آبنائے ہرمز کے مشرقی حصے میں نشانہ بنایا گیا، جبکہ بعد ازاں دو مزید ٹینکر جنوبی حصے میں بارودی سرنگوں سے ٹکرا گئے۔ ایرانی بحریہ کے مطابق ہفتے کی صبح ایک آئل ٹینکر ممنوعہ سمندری علاقے سے گزرنے کی کوشش کے دوران بارودی سرنگ سے ٹکرا گیا، جس کے بعد جہاز میں آگ بھڑک اٹھی اور اسے اپنا سفر روکنا پڑا۔

بعد ازاں پاسدارانِ انقلاب کی بحری فورس نے دو مزید آئل ٹینکروں کے بارودی سرنگوں سے ٹکرانے کی اطلاع دی۔ ایرانی سرکاری خبر رساں ادارے ارنا کے مطابق ان دونوں جہازوں نے اپنے ریڈار اور خودکار شناختی نظام (AIS) بند کر رکھے تھے اور وہ غیر مجاز راستے سے خفیہ طور پر آبنائے ہرمز عبور کرنے کی کوشش کر رہے تھے۔

آبنائے ہرمز دنیا کی سب سے اہم بحری گزرگاہوں میں شمار ہوتی ہے اور عالمی سطح پر تیل کی ترسیل کا ایک بڑا حصہ اسی راستے سے گزرتا ہے۔ اس آبنائے میں کسی بھی قسم کی خلل یا بحری واقعے کا اثر عالمی منڈیوں اور توانائی کی سپلائی پر پڑ سکتا ہے، اس لیے اس طرح کے واقعات بین الاقوامی سطح پر توجہ کا مرکز بنتے ہیں۔

واضح رہے کہ ایرانی حکام کی جانب سے جاری کردہ بیان میں متاثرہ جہازوں کی شناخت یا ان کے پرچم کے بارے میں تفصیلات فراہم نہیں کی گئیں۔ اس واقعے کی مزید تحقیقات اور اس کے اثرات کا جائزہ جاری ہے، جبکہ سمندری راستوں کی صورتحال پر بھی نظر رکھی جا رہی ہے۔

یاد رہے کہ خطے میں بحری سلامتی کے حوالے سے حساسیت پہلے ہی موجود ہے اور آبنائے ہرمز میں اس نوعیت کے واقعات تجارتی جہاز رانی کے لیے خطرات کو اجاگر کرتے ہیں۔ ماہرین کے مطابق بحری راستوں کی حفاظت اور بین الاقوامی تعاون اس قسم کے خطرات کو کم کرنے کے لیے ضروری ہے۔