اسحاق ڈار کا افغانستان کے حوالے سے پڑوسی ممالک کے خدشات دور کرنے پر زور
اسلام آباد میں اقتصادی تعاون تنظیم (ای سی او) کی وزرائے خارجہ کونسل کے 30 ویں اجلاس میں پاکستان نے پُرامن افغانستان کی خواہش کا اعادہ کرتے ہوئے کہا ہے کہ افغان حکام کو پڑوسی ممالک کے جائز سیکیورٹی خدشات دور کرنے ہوں گے۔
یہ خبر اور ہر اہم خبر سب سے پہلے واٹس ایپ پر پائیںaround.pk اردو خبریں چینل — مفت، بغیر سپیم فالو کریں
اسلام آباد میں اقتصادی تعاون تنظیم (ای سی او) کی وزرائے خارجہ کونسل کے 30 ویں اجلاس کا آغاز ہو گیا ہے، جس سے خطاب کرتے ہوئے نائب وزیر اعظم اور وزیر خارجہ اسحاق ڈار نے کہا کہ پاکستان افغانستان کو ایک پُرامن، خوشحال اور مستحکم ملک کے طور پر دیکھنا چاہتا ہے جو خطے کے وسیع تر نظام کا حصہ بنے اور اپنے تمام پڑوسی ممالک کے ساتھ امن و استحکام سے رہے۔
اسحاق ڈار نے کہا کہ افغان حکام کو بامعنی پیش رفت کے لیے پڑوسی ممالک کے جائز سیکیورٹی خدشات بھی دور کرنے چاہئیں۔ ان کے مطابق پاکستان علاقائی تعاون کو خوشحالی، امن اور استحکام کے فروغ کے لیے ناگزیر سمجھتا ہے، جس کی بنیاد خودمختار مساوات، عدم مداخلت اور باہمی احترام و تعاون کے اصولوں پر قائم ہے۔
انہوں نے کہا کہ جغرافیائی سیاسی غیر یقینی صورتحال، اقتصادی دباؤ اور ٹیکنالوجی کے شعبے میں تیز تر تبدیلیوں کے تناظر میں علاقائی تعاون کی اہمیت مزید بڑھ گئی ہے۔ نائب وزیر اعظم نے خطے کی منفرد جغرافیائی اہمیت اور مختلف شعبوں میں وسیع امکانات کا ذکر کرتے ہوئے کاروباری سرگرمیوں میں سہولت کے لیے موثر ٹرانسپورٹ راہداریوں، آسان اور مؤثر سرحدی طریقہ کار اور طے شدہ انتظامات کی ضرورت پر زور دیا۔
اجلاس میں اقتصادی تعاون کے لیے ای سی او کے اسٹریٹجک اہداف 2035 کی منظوری دی جائے گی اور اسلام آباد اعلامیے کو حتمی منظوری کے لیے پیش کیا جائے گا۔ دستاویز کے مطابق ای سی او وژن 2025 کی جگہ اسٹریٹجک اہداف 2035 کو نیا فریم ورک بنانے کی تجویز دی گئی ہے، جبکہ اجلاس میں ای سی او کے سیکرٹری جنرل ڈاکٹر اسد ایم خان کی سالانہ رپورٹ کا جائزہ لیا جائے گا اور 2027 کے بجٹ کی منظوری بھی ایجنڈے میں شامل ہے۔
اجلاس میں ای سی او سائنس فاؤنڈیشن کے صدر پروفیسر سید کمیل طیبی کی دوبارہ تقرری کی منظوری بھی متوقع ہے، جبکہ ای سی او کی اعلیٰ سطحی کمیٹی کی پہلی رپورٹ پر تجاویز کی منظوری بھی دی جائے گی۔ ایرانی وزیر خارجہ عباس عراقچی سمیت غیر ملکی وفود اسلام آباد پہنچ چکے ہیں، اور وفاقی وزیر اطلاعات عطااللہ تارڑ نے کہا ہے کہ اجلاس اقتصادی ترقی اور بحالی کے حوالے سے خوش آئند خبر ہے۔
اب تک کی کہانی اقتصادی تعاون تنظیم
- اسلام آباد میں اقتصادی تعاون تنظیم کے 30ویں اجلاس کی تیاریاں مکمل، غیر ملکی وفود کی آمد جاری
- ای سی او اجلاس: اقتصادی ترقی اور بحالی کے حوالے سے مثبت خبریں، عطااللہ تارڑ
- ای سی او وزرائے کونسل کا 30واں اجلاس اسلام آباد میں شروع، خطے میں تجارت اور تعاون کے نئے اہداف متوقع
- اسلام آباد میں 30ویں ایکو کانفرنس کا آغاز، رکن ممالک کے وفود پہنچ گئے









