سندھ کے کئی اضلاع میں خشک سالی کا خطرہ، این ڈی ایم اے نے ہائی الرٹ جاری کر دیا
نیشنل ایمرجنسیز آپریشن سینٹر کے مطابق سندھ کے اضلاع عمرکوٹ، تھرپارکر، میرپورخاص اور سجاول کے بعض علاقوں میں خشک سالی کا شدید خطرہ ہے، جبکہ بلوچستان کے اضلاع چاغی اور واشک بھی متاثر ہو رہے ہیں۔
یہ خبر اور ہر اہم خبر سب سے پہلے واٹس ایپ پر پائیںaround.pk اردو خبریں چینل — مفت، بغیر سپیم فالو کریں
نیشنل ڈیزاسٹر مینجمنٹ اتھارٹی (این ڈی ایم اے) کے نیشنل ایمرجنسیز آپریشن سینٹر (این ای او سی) نے ملک بھر میں خشک سالی کی صورتحال کا جائزہ لیتے ہوئے سندھ کے مختلف اضلاع کے لیے ہائی الرٹ جاری کر دیا ہے۔ این ای او سی کے مطابق سندھ کے اضلاع عمرکوٹ، تھرپارکر، میرپورخاص اور سجاول کے بعض علاقوں میں خشک سالی کا شدید خطرہ موجود ہے اور صورتحال کی مسلسل نگرانی کی جا رہی ہے۔
ادارے کے مطابق بلوچستان کے ضلع چاغی اور ضلع واشک کے بعض علاقوں میں بھی خشک سالی کی کیفیت دیکھی جا رہی ہے۔ این ای او سی نے خشک سالی کی اہم وجوہات میں معمول سے کم بارشیں، طویل خشک موسم، درجہ حرارت میں اضافہ اور مون سون بارشوں کے معمول میں تبدیلی کو قرار دیا ہے۔
سندھ کے متاثرہ علاقوں میں درجہ حرارت معمول سے ایک سے تین ڈگری سینٹی گریڈ زیادہ ریکارڈ کیا جا رہا ہے، جبکہ پانی کی کمی کے باعث زرعی سرگرمیاں اور فصلوں کی پیداوار شدید متاثر ہو رہی ہے۔ این ای او سی کے مطابق فصلوں کی پیداوار میں کمی سے غذائی عدم تحفظ کے خدشات بھی بڑھ رہے ہیں۔
این ڈی ایم اے نے متعلقہ اداروں کو ہدایت کی ہے کہ وہ آبی وسائل کے مؤثر استعمال اور متاثرہ زرعی و دیہی آبادی کے تحفظ کے لیے پیشگی اقدامات یقینی بنائیں۔ عوام کو بھی ہدایت کی گئی ہے کہ وہ فصلوں اور مویشیوں کے تحفظ کے لیے متعلقہ محکموں کی ہدایات پر عمل کریں اور ضروری حفاظتی اقدامات کریں۔
شہریوں کو موسم اور ممکنہ خطرات کے حوالے سے مستند معلومات کے لیے پاک این ڈی ایم اے ڈیزاسٹر الرٹ موبائل ایپ سے رہنمائی حاصل کرنے کی بھی ہدایت کی گئی ہے۔
واضح رہے کہ خشک سالی کی صورتحال نہ صرف زراعت بلکہ پینے کے پانی اور دیہی معیشت پر بھی اثر انداز ہو سکتی ہے، اس لیے متعلقہ محکموں کی جانب سے بروقت اقدامات اور عوامی آگاہی اس صورتحال میں اہم کردار ادا کر سکتی ہے۔
اب تک کی کہانی چاغی
- پاکستان منرلز انویسٹمنٹ فورم 2026: 13 معاہدے، چاغی میں تانبے کے 35 کروڑ ٹن ذخائر کا انکشاف
- چاغی میں سونے اور تانبے کی تلاش کے لیے آئیون ہو مائنز اور ماڑی منرلز کے درمیان معاہدہ








