ملک کے 53 فیصد سرکاری اسکولوں میں بنیادی سہولیات موجود نہیں، رپورٹ

ملک بھر کے سرکاری اسکولوں کی صورتحال پر تازہ مانیٹرنگ رپورٹس سامنے آئی ہیں جن کے مطابق 53 فیصد سرکاری اسکولوں میں پانچ بنیادی تعلیمی سہولیات دستیاب نہیں ہیں۔ ان سہولیات میں بجلی، پینے کا صاف پانی، بیت الخلا، چار دیواری اور محفوظ عمارت شامل ہیں۔ رپورٹس کے مطابق کسی بھی سرکاری اسکول میں طلبہ کے لیے مفت ٹرانسپورٹ کی سہولت بھی میسر نہیں۔

صوبائی سطح پر جائزے سے پتہ چلتا ہے کہ تعلیمی انفراسٹرکچر کے لحاظ سے سب سے زیادہ متاثرہ صوبہ بلوچستان ہے، جہاں 79 فیصد اسکولوں میں بجلی اور 71 فیصد میں پینے کا صاف پانی دستیاب نہیں۔ سندھ میں صرف 8 فیصد سرکاری اسکولوں میں پانچوں بنیادی سہولیات مکمل طور پر موجود ہیں جبکہ 73 فیصد اسکولوں میں ان کا فقدان ہے۔

رپورٹ کے مطابق اساتذہ کی کمی بھی ایک بڑا چیلنج ہے۔ ملک بھر میں 41 فیصد پرائمری اسکول صرف ایک استاد کے سہارے چل رہے ہیں، جبکہ سندھ میں یہ تناسب 45 فیصد ہے۔ خیبر پختونخوا میں بنیادی سہولیات کی عدم دستیابی 36 فیصد ریکارڈ کی گئی ہے اور صوبے کے 36,967 کلاس رومز کو فوری طور پر تعمیرِ نو یا بڑی مرمت کی ضرورت ہے۔

پنجاب کی صورتحال دیگر صوبوں کے مقابلے میں قدرے بہتر ہے، جہاں بنیادی سہولیات کی دستیابی 74 فیصد ہے۔ تاہم مانیٹرنگ رپورٹس کے مطابق لاہور اور بھکر سمیت مختلف اضلاع کے کئی اسکولوں میں صفائی اور فعال بیت الخلا کے مسائل بدستور برقرار ہیں۔

ماہرین تعلیم کے مطابق یہ اعداد و شمار بتاتے ہیں کہ ملک میں تعلیمی سہولیات کی فراہمی میں صوبائی عدم مساوات واضح ہے۔ ان کا کہنا ہے کہ اسکولوں میں بنیادی ڈھانچے کی کمی طلبہ کے تعلیمی معیار اور حاضری پر براہ راست اثر ڈالتی ہے، اور اس مسئلے کے حل کے لیے صوبائی حکومتوں کو ہنگامی بنیادوں پر سرمایہ کاری کرنی ہوگی۔