انڈونیشیا کے نائب صدر جبران راکابومنگ نے تعلیمی اسناد کے تنازعے پر استعفیٰ دے دیا

انڈونیشیا کے نائب صدر جبران راکابومنگ راکا نے اپنے عہدے سے استعفیٰ دے دیا ہے۔ عالمی خبر رساں ادارے کے مطابق 39 سالہ جبران نے 12 نومبر کو اپنا استعفیٰ صدر پرابوو سوبیانتو اور پارلیمنٹ کے سامنے پیش کیا، جسے صدر نے قبول کرلیا۔ واضح رہے کہ جبران 2024 کے انتخابات میں انڈونیشیا کے کم عمر ترین نائب صدر منتخب ہوئے تھے اور وہ سابق صدر جوکو ویدودو کے صاحبزادے بھی ہیں۔

استعفے کی وجہ کے حوالے سے جبران کا کہنا ہے کہ یہ ان کا انتہائی ذاتی فیصلہ ہے اور اس کی بنیاد نجی مصروفیات ہیں۔ تاہم یہ استعفیٰ ایسے وقت میں سامنے آیا ہے جب ان کی تعلیمی اسناد کے حوالے سے عدالتی کارروائی عروج پر تھی، جس کی وجہ سے سیاسی حلقوں میں اسے اہم پیش رفت قرار دیا جا رہا ہے۔

تنازع اس وقت شدت اختیار کر گیا جب انڈونیشیا کی آئینی عدالت اور سپریم کورٹ نے گزشتہ ماہ قرار دیا کہ جبران کی بیرون ملک حاصل کردہ ثانوی تعلیم سے متعلق دستاویزات انتخابی اہلیت کے قانونی تقاضے پورے نہیں کرتیں۔ جبران نے سنگاپور میں تعلیم حاصل کی تھی اور 2024 کے انتخابات میں حصہ لیتے وقت اپنی تعلیمی سند کو انڈونیشیا کے ہائی اسکول کے مساوی قرار دینے والا دستاویز جمع کرایا تھا، جسے سپریم کورٹ نے کالعدم قرار دے دیا۔

معاملہ یہاں تک پہنچا کہ پارلیمنٹ کے 120 ارکان نے آٹھ جماعتوں کی نمائندگی کرتے ہوئے ان کے خلاف ممکنہ مواخذے کی کارروائی شروع کرنے کی حمایت کردی۔ صدر پرابوو سوبیانتو نے اپنے نائب صدر کی خدمات کو سراہتے ہوئے کہا کہ انہوں نے ملکی مفاد میں عہدہ چھوڑا ہے۔

انڈونیشیا کے آئین کے تحت اب پارلیمنٹ کو 60 روز کے اندر نئے نائب صدر کا انتخاب کرنا ہوگا۔ اس پیش رفت نے ملکی سیاسی منظرنامے میں ایک نئی بحث کو جنم دیا ہے، جہاں ایک طرف حکومت نے جمہوری طریقہ کار پر عمل جاری رکھنے کا عزم ظاہر کیا ہے تو دوسری طرف نائب صدر کے عہدے کی خالی جگہ کو جلد پر کرنے کے لیے آئینی تقاضے پورے کرنے پر زور دیا جا رہا ہے۔