مستونگ میں خودکش بارودی گاڑی کا حملہ ناکام، دو شہری شہید اور 17 زخمی

بلوچستان کے ضلع مستونگ میں قومی شاہراہ این 25 پر سیکیورٹی فورسز نے ایک بڑے حملے کی کوشش ناکام بنا دی ہے۔ حکومت بلوچستان کے ترجمان کے مطابق دہشت گردوں نے بارود سے بھری گاڑی کے ذریعے کنڈوا پوسٹ کے قریب حملہ کرنے کی کوشش کی، تاہم فورسز کی بروقت کارروائی سے اسے ناکام کر دیا گیا۔

جوابی کارروائی میں تین دہشت گرد ہلاک ہو گئے، جبکہ دھماکے کے نتیجے میں دو شہری شہید اور سترہ افراد زخمی ہوئے ہیں۔ پولیس کے مطابق زخمیوں میں فرنٹیئر کور کے تین اہلکار بھی شامل ہیں، جنہیں علاج کے لیے اسپتال منتقل کیا گیا۔

دھماکے کی شدت سے قریبی رہائشی مکانات اور ایک مسجد کو بھی نقصان پہنچا ہے۔ امدادی ٹیمیں موقع پر پہنچ کر زخمیوں کو طبی امداد فراہم کر رہی ہیں اور علاقے میں مزید حفاظتی اقدامات کیے جا رہے ہیں۔

وزیر داخلہ بلوچستان ضیاء لانگو نے حملے کی ناکامی پر سیکیورٹی فورسز کو خراج تحسین پیش کرتے ہوئے کہا کہ کنڈوا پوسٹ کے قریب حملے کو ناکام بنانا فورسز کی پیشہ ورانہ صلاحیتوں کا واضح ثبوت ہے۔ انہوں نے کہا کہ سیکیورٹی فورسز کی جرات مندانہ کارروائی نے دہشت گردوں کے مذموم عزائم کو ناکام بنا دیا۔

صوبائی وزیر نے کہا کہ حکومت بلوچستان غمزدہ خاندانوں کے ساتھ کھڑی ہے اور زخمیوں کے علاج کے لیے ہر ممکن سہولت فراہم کی جا رہی ہے۔ انہوں نے عوام پر زور دیا کہ وہ سیکیورٹی اداروں کے ساتھ تعاون جاری رکھیں، کیونکہ عوامی تعاون کے بغیر دہشت گردی کے خاتمے کی مہم مکمل نہیں ہو سکتی۔

واضح رہے کہ مستونگ اور اس کے گرد و نواح میں گزشتہ کچھ عرصے کے دوران سیکیورٹی فورسز کے خلاف متعدد حملوں کی کوششیں کی گئی ہیں، جنہیں وقتاً فوقتاً ناکام بنایا جاتا رہا ہے۔ حکام کے مطابق اس واقعے کی مزید تحقیقات جاری ہیں اور علاقے میں نگرانی میں اضافہ کر دیا گیا ہے۔