اپر کوہستان اسکینڈل: نیشنل بینک داسو کے سابق کیشئر کی 51 کروڑ روپے کی پلی بارگین منظور، جائیدادیں ضبط

پشاور کی احتساب عدالت نے اپر کوہستان کرپشن اسکینڈل میں اہم پیش رفت کرتے ہوئے نیشنل بینک داسو برانچ کے سابق کیشئر مشرف شاہ کی پلی بارگین کی درخواست منظور کر لی ہے۔ عدالت کے جج محمد حامد مغل نے ملزم کی درخواست پر تفصیلی تحریری فیصلہ جاری کیا اور ان کی رہائی کا حکم دیا۔

عدالت نے فیصلے میں کہا کہ ملزم کی جانب سے 51 کروڑ 31 لاکھ 38 ہزار 424 روپے کی پلی بارگین درخواست جمع کرائی گئی تھی، جسے منظور کرتے ہوئے تمام منقولہ و غیر منقولہ جائیدادیں اور رقوم حکومت خیبر پختونخوا کے حق میں ضبط کرنے کا حکم دیا گیا۔ تاہم نیب آرڈیننس کے تحت ملزم کو سزا یافتہ تصور کرتے ہوئے نااہل قرار دے دیا گیا ہے۔

نیب کے مطابق اپر کوہستان اسکینڈل میں 37 ارب روپے سے زائد رقم ترقیاتی منصوبوں کے نام پر قومی خزانے سے نکالی گئی، جبکہ ان منصوبوں کا زمین پر کوئی وجود نہیں تھا۔ تحقیقات کے دوران ملزم مشرف شاہ کو حراست میں لیا گیا تھا اور انہوں نے رضاکارانہ طور پر پلی بارگین کی درخواست جمع کرائی، جس پر نیب حکام نے مجموعی واجب الادا رقم کا تعین کیا۔

عدالت نے نیب کا حوالہ دیتے ہوئے بتایا کہ ملزم نے اپنی اہلیہ، بھائی اور دوست کے ناموں اور بینک اکاؤنٹس کا استعمال کیا۔ ان اثاثوں میں ایبٹ آباد میں واقع بنگلہ، بشام میں تین کنال پر مشتمل مکان اور نجی تعمیراتی کمپنیوں کے بیک اکاؤنٹس میں موجود 40 کروڑ روپے سے زائد رقم شامل ہے۔ عدالت نے یہ تمام اثاثے اب سرکاری تحویل میں لینے کا حکم دیا ہے۔

فیصلے میں مزید کہا گیا کہ ملزم، اس کی اہلیہ، بھائی اور دوست کے بیانات کسی دباؤ یا جبر کے بغیر رضاکارانہ طور پر دیے گئے ہیں، اس لیے پلی بارگین کی درخواست کی توثیق کی جاتی ہے۔ واضح رہے کہ یہ فیصلہ اپر کوہستان میں ترقیاتی فنڈز کے مبینہ غبن کے حوالے سے جاری تحقیقات کا ایک اہم حصہ ہے۔

یاد رہے کہ پلی بارگین نیب کے قانون کے تحت ایک ایسا طریقہ کار ہے جس میں ملزم قومی خزانے کو ہونے والے نقصان کی تلافی کی رقم ادا کرنے پر رضامند ہوتا ہے، جس کے بدلے میں کیس کا خاتمہ اور رہائی عمل میں آتی ہے۔ اس قسم کے فیصلے ملک میں بدعنوانی کے خلاف کارروائی اور سرکاری اداروں کی شفافیت کے حوالے سے اہم سمجھے جاتے ہیں۔