بابا گرو نانک کے 557 ویں جنم دن کی تقریبات، 3 ہزار سکھ یاتریوں کو ویزے جاری
پاکستان ہائی کمیشن نیو دہلی نے بابا گرو نانک کے 557 ویں جنم دن کی تقریبات کے لیے تقریباً 3 ہزار سکھ یاتریوں کو ویزے جاری کر دیے ہیں، مرکزی تقریب 24 نومبر کو گوردوارہ جنم استھان ننکانہ صاحب میں منعقد ہوگی۔
یہ خبر اور ہر اہم خبر سب سے پہلے واٹس ایپ پر پائیںaround.pk اردو خبریں چینل — مفت، بغیر سپیم فالو کریں
سکھ مذہب کے بانی بابا گرو نانک دیو جی کے 557 ویں جنم دن کی تقریبات کی تیاریاں مکمل کر لی گئی ہیں۔ پاکستان ہائی کمیشن نیو دہلی کی جانب سے تقریباً تین ہزار سکھ یاتریوں کو ویزے جاری کیے گئے ہیں، جو 22 نومبر کو واہگہ بارڈر کے راستے پاکستان پہنچیں گے۔ واہگہ بارڈر پر ان کا استقبال کیا جائے گا اور اسپیشل بسوں کے ذریعے انہیں ننکانہ صاحب روانہ کیا جائے گا۔
شیڈول کے مطابق یاتری 23 نومبر کو ننکانہ صاحب کے مختلف گوردواروں کی زیارت کریں گے، جبکہ 24 نومبر کو گوردوارہ جنم استھان ننکانہ صاحب میں جنم دن کی مرکزی تقریب منعقد ہوگی۔ اس موقع پر بھوگ اور اکھنڈ پاٹھ صاحب کی مذہبی رسومات ادا کی جائیں گی۔ اس کے بعد 25 نومبر کو یاتری گوردوارہ سچا سودا اور فاروق آباد کے راستے حسن ابدال روانہ ہوں گے، جہاں وہ رات گوردوارہ پنجہ صاحب میں گزارے گا۔
یاتری 26 نومبر کو بھی گوردوارہ پنجہ صاحب میں قیام کریں گے، جبکہ 27 نومبر کو گوردوارہ دربار صاحب کرتارپور نارووال کا رخ کریں گے اور رات نارووال میں گزاریں گے۔ 28 نومبر کو نارووال میں گوردوارہ دربار صاحب کے مقام پر کبڈی کا میچ بھی منعقد ہوگا، جس کے بعد یاتری لاہور پہنچ کر گوردوارہ ڈیرہ صاحب میں قیام کریں گے۔
متروکہ وقف املاک بورڈ کے حکام کے مطابق یاتریوں کے سفر کے لیے اسپیشل بسوں کا انتظام کیا گیا ہے جن کا کرایہ یاتری خود ادا کریں گے، تاہم ان کی رہائش اور کھانے کا انتظام بورڈ کی جانب سے مفت فراہم کیا جائے گا۔ اس کے علاوہ یاتریوں کو میڈیکل کی مفت سہولت بھی دستیاب ہوگی۔
پاکستان اور بھارت کے درمیان مذہبی سیاحت کے معاہدے کے تحت بابا گرو نانک کے جنم دن پر بھارت سے تین ہزار یاتری پاکستان آ سکتے ہیں، تاہم ذرائع کے مطابق تین ہزار سے زیادہ یاتری پاکستان آنا چاہتے تھے لیکن بھارتی حکومت کی کلیئرنس نہ ملنے کی وجہ سے بڑی تعداد میں سکھ اور نانک نام لیوا پاکستان نہیں آ سکے۔ اندازوں کے مطابق ڈھائی ہزار سے زائد یاتریوں کی آمد متوقع ہے۔
گزشتہ سال پاکستان کی جانب سے 2400 ویزے جاری کیے گئے تھے، تاہم 1932 یاتری پاکستان آئے تھے، جبکہ تقریباً 300 یاتریوں کے ایک جتھے کو بھارتی حکومت نے پاکستان آنے کی اجازت نہیں دی تھی۔ واضح رہے کہ یاتری 29 اور 30 نومبر کو لاہور کے مختلف گوردواروں کی زیارت کریں گے اور یکم دسمبر کو واہگہ بارڈر کے راستے بھارت واپس روانہ ہو جائیں گے۔
یہ تقریبات پاکستان میں مذہبی سیاحت کو فروغ دینے اور اقلیتوں کی عبادت گاہوں تک رسائی کی سہولت فراہم کرنے کے حوالے سے اہمیت کی حامل ہیں، جن کے انعقاد کے لیے انتظامیہ نے سکیورٹی، رہائش اور طبی سہولیات سمیت تمام ضروری انتظامات مکمل کر لیے ہیں۔









