واٹس ایپ عام صارفین کے لیے کور فوٹو فیچر متعارف کرانے کی تیاری میں
واٹس ایپ جلد عام صارفین کو بھی پروفائل کور فوٹو لگانے کی سہولت دے سکتا ہے، جو اب تک صرف واٹس ایپ بزنس اکاؤنٹس کے لیے دستیاب تھی۔ نئی تصویر پروفائل پکچر کو تبدیل کیے بغیر الگ دکھائی دے گی۔
واٹس ایپ اپنے عام صارفین کے لیے ایک نیا فیچر متعارف کرانے کی تیاری کر رہا ہے جس کے تحت اب ہر صارف اپنے ذاتی پروفائل پر کور فوٹو لگا سکے گا۔ اس سے قبل یہ سہولت صرف واٹس ایپ بزنس اکاؤنٹس تک محدود تھی، تاہم کمپنی اب اسے عام صارفین تک پھیلانے پر کام کر رہی ہے۔
نئے فیچر کے تحت صارفین اپنے پروفائل کے اوپری حصے میں ایک بڑی لینڈ اسکیپ تصویر لگا سکیں گے۔ یہ تصویر نہ صرف پروفائل پر بلکہ ایپ کی سیٹنگز اور چیٹ انفارمیشن اسکرین پر بھی نظر آئے گی، یعنی جب کوئی دوسرا صارف آپ کی چیٹ کھولے گا تو اسے یہ تصویر دکھائی دے گی۔
اس فیچر کی سب سے اہم بات یہ ہے کہ کور فوٹو لگانے سے صارف کی موجودہ پروفائل پکچر تبدیل نہیں ہوگی بلکہ دونوں تصاویر الگ الگ دکھائی دیں گی۔ اس طرح صارفین اپنی شناخت برقرار رکھتے ہوئے اپنے پروفائل کو مزید دلکش بنا سکیں گے۔
کور فوٹو لگانے کے لیے صارفین کو اپنا واٹس ایپ پروفائل کھول کر ’ایڈٹ‘ کے بٹن پر کلک کرنا ہوگا، جہاں انہیں تین آپشنز فراہم کیے جائیں گے۔ صارف موبائل کیمرے سے نئی تصویر بنا سکے گا، فون کی گیلری سے اپنی پسند کی تصویر منتخب کر سکے گا یا میٹا اے آئی کی مدد سے نئی تصویر تیار کر سکے گا۔
واٹس ایپ منتخب کردہ تصویر کو خودکار طریقے سے کور فوٹو کے لیے مختص جگہ کے مطابق ایڈجسٹ کرے گا، جس سے صارفین کو دستی ایڈیٹنگ کی ضرورت نہیں ہوگی۔ اس اقدام سے صارفین کو اپنے واٹس ایپ پروفائل کو مزید منفرد اور خوبصورت بنانے کا موقع ملے گا۔
واضح رہے کہ واٹس ایپ کی جانب سے اس فیچر کے اجرا کی حتمی تاریخ ابھی سامنے نہیں آئی، تاہم توقع ہے کہ آئندہ چند ماہ میں یہ سہولت مرحلہ وار طور پر تمام صارفین کے لیے دستیاب کر دی جائے گی۔
یہ پیش رفت ایسی صورتحال میں سامنے آئی ہے جب مختلف ٹیکنالوجی کمپنیاں اپنی ایپس میں صارفین کی ذاتی نوعیت کی customization کو فروغ دے رہی ہیں۔ واٹس ایپ کی جانب سے یہ اقدام صارف کے تجربے کو بہتر بنانے کی کوششوں کا حصہ قرار دیا جا رہا ہے۔
