کراچی میں ہیوی ٹریفک کیخلاف پابندی کی دھجیاں بکھیر، ٹریلر کی ٹکر سے موٹرسائیکل سوار جاں بحق
کراچی میں تین روز کے دوران ہیوی ٹریفک کے حادثات میں حاملہ خاتون سمیت تین افراد جان سے ہاتھ دھو بیٹھے جبکہ چار افراد زخمی ہوئے، اورنگی ٹاؤن میں ممنوعہ اوقات میں ٹریلر کی ٹکر سے 30 سالہ موٹرسائیکل سوار جاں بحق ہوگیا۔
کراچی میں ہیوی گاڑیوں کے شہر میں داخلے کی پابندی کے باوجود ٹریلرز اور واٹر ٹینکروں کی جانب سے جان لیوا حادثات کا سلسلہ تھمنے کا نام نہیں لے رہا، اور تازہ واقعے میں اورنگی ٹاؤن کے علاقے سیکٹر 15 بنگلہ بازار کے قریب ٹریلر کی ٹکر سے ایک موٹرسائیکل سوار جان سے ہاتھ دھو بیٹھا۔ ریسکیو حکام کے مطابق متوفی کی شناخت 30 سالہ طلحہ کے نام سے ہوئی، جن کی لاش کو ضابطے کی کارروائی کے لیے عباسی شہید اسپتال منتقل کیا گیا۔
موقع پر موجود شہریوں کا کہنا ہے کہ جس وقت یہ حادثہ پیش آیا اس وقت ہیوی گاڑیوں کے شہر میں داخلے پر پابندی عائد تھی، تاہم ذمہ دار ڈرائیور ممنوعہ اوقات میں ٹریلر لے کر بازار کے علاقے تک پہنچ گیا اور قیمتی انسانی جان لینے کے بعد گاڑی موقع پر چھوڑ کر فرار ہوگیا۔ حادثے کی ذمہ داری کے حوالے سے سوال اٹھایا جا رہا ہے کہ پابندی کی خلاف ورزی کیسے ممکن ہوئی اور اس کا جواب دہ کون ہوگا۔
گزشتہ جمعے کی رات سے پیر کی شام تک کے مختصر عرصے میں ٹریلر اور واٹر ٹینکر کے حادثات میں حاملہ خاتون سمیت تین شہری جاں بحق اور چار افراد شدید زخمی ہوچکے ہیں۔ ان واقعات میں لیاقت آباد اور کریم آباد کے علاقوں میں مشتعل عوام نے جمعے اور اتوار کی رات حادثات کے ذمہ دار دو ٹریلروں کو نذر آتش بھی کیا، لیکن اس کے باوجود ہیوی گاڑیوں کی جانب سے جان لیوا حادثات میں کوئی کمی نہیں آ رہی۔
ٹریفیک پولیس کی جانب سے ہیوی ٹریفک کے داخلے پر عائد پابندی کے نفاذ میں سنجیدگی کا مظاہرہ نہیں کیا جا رہا، جس کے سبب خلاف ورزیاں کھلے عام جاری ہیں۔ مبصرین کے مطابق اگر ممنوعہ اوقات میں ہیوی گاڑیوں کی چیکنگ مؤثر انداز میں کی جاتی تو ممکنہ طور پر ان قیمتی جانوں کو بچایا جا سکتا تھا۔
واضح رہے کہ شہر میں ہیوی گاڑیوں کے داخلے کے اوقات کا تعین ٹریفک کے بہاؤ اور شہریوں کی حفاظت کو مدنظر رکھتے ہوئے کیا جاتا ہے، تاہم ان قواعد کی پاسداری یقینی بنانے کے لیے نگرانی کے عمل کو مضبوط کرنے اور خلاف ورزی کرنے والوں کے خلاف سخت کارروائی کی ضرورت ہے۔ ماہرین کا کہنا ہے کہ ٹریلرز اور بھاری گاڑیوں کے ڈرائیوروں کی تربیت، روٹس کی واضح نشاندہی اور چیک پوسٹوں پر مؤثر کنٹرول سے اس قسم کے حادثات میں نمایاں کمی لائی جا سکتی ہے۔
شہریوں نے متعلقہ حکام سے مطالبہ کیا ہے کہ ہیوی ٹریفک کیخلاف پابندی کے نفاذ کو یقینی بنایا جائے اور ذمہ دار ڈرائیوروں کے خلاف قانونی کارروائی عمل میں لائی جائے تاکہ شہر کی سڑکوں پر محفوظ سفر کو ممکن بنایا جا سکے۔
