کراچی ایئرپورٹ: جعلی ای پروٹیکٹر پر عراق روانگی کی کوشش ناکام، 3 مسافر آف لوڈ

ایف آئی اے امیگریشن کراچی نے جعلی ای پروٹیکٹر رجسٹریشن اور فرضی ملازمت کی بنیاد پر عراق روانگی کی کوشش ناکام بنا دی ہے اور تین مسافروں کو بیرونِ ملک روانگی سے روک کر آف لوڈ کر دیا ہے۔ ترجمان ایف آئی اے کے مطابق یہ کارروائی امیگریشن کلیئرنس کے دوران غیر معمولی باریک بینی اور مؤثر جانچ پڑتال کے نتیجے میں عمل میں آئی۔

ترجمان نے بتایا کہ تینوں مسافر عراق کے ورک ویزوں پر سفر کر رہے تھے اور ان کے پاس 23 اکتوبر 2026 کو جاری کردہ ای پروٹیکٹر رجسٹریشن موجود تھی، جس میں انہیں بلیو روز کنسٹرکشن، بصرہ میں ورکر کنسٹرکشن کے طور پر دکھایا گیا تھا۔ تاہم دستاویزات میں تنخواہ، آجر کے فون نمبر اور ای میل کے خانے خالی ہونے کے باعث انہیں مشکوک قرار دیا گیا۔

تحقیقات کے مطابق ضلع گجرات کے رہائشی آکاش طارق، مرزا سلیمان ظفر بیگ اور مرزا سفیان مظہر بیگ نے گجرات کے رہائشی ایجنٹ شاہد سے چار لاکھ روپے کے عوض جعلی ای پروٹیکٹر تیار کروائے تھے، جبکہ ملازمت اور ویزوں کا انتظام ان کے رشتہ داروں یاسر اور یاسین کے ذریعے کیا گیا تھا۔

ابتدائی جانچ میں یہ خدشہ بھی سامنے آیا ہے کہ یہ مسافر عراق کے راستے غیر قانونی طور پر یورپ پہنچنے کی کوشش کر رہے تھے، جس کی مزید تصدیق کی جا رہی ہے۔ ایف آئی اے امیگریشن کراچی نے مشتبہ دستاویزات کی بروقت نشاندہی کرتے ہوئے تینوں مسافروں کو آف لوڈ کیا اور مزید تحقیقات، ایجنٹوں کے کردار کی جانچ اور قانونی کارروائی کے لیے انہیں اے ایچ ٹی سی کراچی کے حوالے کر دیا ہے۔

ترجمان نے کہا کہ یہ کارروائی ایف آئی اے امیگریشن کراچی کی مستعدی، پیشہ ورانہ مہارت اور جعلی سفری دستاویزات کے ذریعے غیر قانونی امیگریشن کی روک تھام کے عزم کا واضح ثبوت ہے۔ واضح رہے کہ غیر قانونی طریقوں سے بیرونِ ملک جانے کی کوشش نہ صرف قانونی کارروائی بلکہ مسافروں کے لیے سنگین خطرات کا سبب بھی بن سکتی ہے، اس لیے عوام کو مستند ایجنٹس اور درست دستاویزات کے ذریعے سفر کرنے کی ہدایت کی جاتی ہے۔