کراچی کے ضلع وسطی میں پولیو مہم کے دوران غیر متعلقہ ملازمین کی تعیناتی کا انکشاف

کراچی کے ضلع وسطی میں جاری انسدادِ پولیو مہم کے دوران ایک بار پھر غیر متعلقہ ملازمین کی تعیناتی کا انکشاف سامنے آیا ہے۔ اطلاعات کے مطابق مالی، ڈرائیور، چوکیدار اور نائب قاصد جیسے عہدوں پر تعینات عملے کو یونین کونسل منیجمنٹ آفیسر (یو سی ایم او) کے طور پر ڈیوٹی پر لگایا گیا ہے، جو کہ پولیو پروگرام کے لیے مطلوبہ مہارت سے ہم آہنگ نہیں۔

واضح رہے کہ گزشتہ پولیو مہم میں بھی اسی نوعیت کی تعیناتیوں کی نشاندہی کی گئی تھی، لیکن اس وقت کوئی مؤثر کارروائی عمل میں نہیں لائی جا سکی۔ ستمبر 2024 میں نافذ کی گئی پالیسی کے تحت نائب قاصد، کلرک، ڈرائیور، چوکیدار، مالی اور وارڈ سرونٹ سمیت دیگر غیر متعلقہ ملازمین کو یو سی ایم او تعینات کرنے پر واضح پابندی عائد ہے۔

ضلع وسطی کے ڈسٹرکٹ ہیلتھ آفیسر ڈاکٹر عدنان خان نے ان تعیناتیوں کا دفاع کرتے ہوئے کہا ہے کہ مذکورہ ملازمین تعلیم یافتہ ہیں اور 2013 سے پولیو پروگرام میں خدمات انجام دے رہے ہیں۔ ان کے مطابق یہ عملہ پولیو مہم کے امور کو بہتر طور پر سمجھتا ہے، اس لیے ڈرائیور، چوکیدار اور نائب قاصد سے کام لینے میں کوئی مضائقہ نہیں۔

تاہم، ماہرین صحت عامہ کے مطابق پولیو مہم ایک انتہائی حساس اور تکنیکی نوعیت کا پروگرام ہے، جس میں یو سی ایم او کا کردار مانیٹرنگ، رپورٹنگ اور ٹیموں کی کارکردگی کو یقینی بنانے میں کلیدی ہے۔ غیر متعلقہ ملازمین کی تعیناتی سے مہم کی کوالٹی اور شفافیت متاثر ہونے کا خدشہ ظاہر کیا جا رہا ہے۔

یہ انکشاف ایسے وقت میں سامنے آیا ہے جب ملک بھر میں پولیو کے خاتمے کے لیے سرگرمیاں جاری ہیں اور ہر مہم کی کامیابی کو ملکی سطح پر اہمیت حاصل ہے۔ سوال یہ ہے کہ واضح پالیسی موجود ہونے کے باوجود ضلع وسطی میں بار بار غیر متعلقہ ملازمین کی تعیناتی کیوں کی جا رہی ہے اور اس سلسلے میں احتساب کا عمل کیوں مؤثر ثابت نہیں ہو رہا۔

ماہرین کا کہنا ہے کہ اس معاملے پر متعلقہ محکمہ صحت کو فوری نوٹس لینا چاہیے اور آئندہ مہمات میں یو سی ایم او کی تعیناتی کے لیے مقررہ ضوابط پر سختی سے عمل درآمد یقینی بنایا جانا چاہیے تاکہ پولیو پروگرام کی کارکردگی اور عوامی اعتماد کو محفوظ رکھا جا سکے۔