کراچی انڈسٹریل پارک کو وفاقی اسپیشل اکنامک زون کی منظوری

پاکستان میں صنعتی ترقی اور برآمدات کے فروغ کے لیے ایک اہم پیش رفت سامنے آئی ہے، جس کے تحت کراچی انڈسٹریل پارک کو وفاقی اسپیشل اکنامک زون کی حیثیت سے منظوری دے دی گئی ہے۔ یہ منظوری اسپیشل انویسٹمنٹ فیسلیٹیشن کونسل (ایس آئی ایف سی) کی معاونت سے دی گئی، جس کا مقصد ملک میں کاروباری آسانیاں بڑھانا اور صنعتی سرمایہ کاری کو فروغ دینا ہے۔

اس سلسلے میں وزیراعظم کے مشیر برائے صنعت و پیداوار ہارون اختر اور ایس آئی ایف سی کے حکام نے فیڈریشن آف پاکستان چیمبرز آف کامرس اینڈ انڈسٹری کے وفد سے اہم ملاقات کی۔ ملاقات میں کاروباری آسانیوں، ڈیجیٹل تبدیلی، آسان کاروبار پروگرام اور صوبہ سندھ کی ترقیاتی صلاحیتوں سے بھرپور استفادے پر تبادلہ خیال کیا گیا۔

منظور شدہ کراچی انڈسٹریل پارک میں بندرگاہ تک رسائی، مکمل بنیادی سہولیات اور برآمدی صنعتوں کے لیے خصوصی مراعات فراہم کی جائیں گی۔ ان سہولیات سے صنعتی سرمایہ کاری میں اضافہ، کاروباری مسابقت میں بہتری اور ملکی برآمدات کو فروغ دینے میں مدد ملے گی۔

ایس آئی ایف سی کے اصلاحاتی اقدامات کا مقصد پاکستان میں کاروبار کرنے کے عمل کو آسان بنانا اور صنعتی شعبے کی ترقی کو تیز کرنا ہے۔ اسپیشل اکنامک زون کی منظوری سے نہ صرف مقامی سرمایہ کاروں بلکہ غیر ملکی سرمایہ کاری کے لیے بھی سازگار ماحول پیدا ہونے کی توقع ہے۔

واضح رہے کہ کراچی انڈسٹریل پارک کو وفاقی اسپیشل اکنامک زون کا درجہ ملنے سے شہر میں صنعتی سرگرمیوں کو فروغ ملے گا اور برآمدی صنعتوں کے لیے خصوصی مراعات کی راہ ہموار ہوگی۔ حکومتی اقدامات کا مقصد صنعتی ترقی کے ذریعے ملکی معیشت کو مضبوط بنانا اور بیرونی سرمایہ کاری کو راغب کرنا ہے۔