پاکستان معدنیات کے شعبے میں غیر ملکی سرمایہ کاری کے لیے عالمی کمپنیوں کی میزبانی کو تیار

پاکستان معدنیات کے شعبے میں غیر ملکی سرمایہ کاری کو راغب کرنے کے لیے ایک بڑے اقدام کی تیاری کر رہا ہے، جہاں رواں برس منرلز انویسٹمنٹ فورم 2026 کے انعقاد کا منصوبہ بنایا گیا ہے۔ یہ فورم اسپیشل انویسٹمنٹ فیسلیٹیشن کونسل (ایس آئی ایف سی) کے تعاون سے منعقد کیا جائے گا اور اس کا مقصد عالمی سرمایہ کاروں اور مائننگ کمپنیوں کو پاکستان کے معدنی منصوبوں اور سرمایہ کاری کے مواقع سے آگاہ کرنا ہے۔

پاکستان منرل ڈویلپمنٹ کارپوریشن (پی ایم ڈی سی) کے چیف ایگزیکٹو انجینئر اسد احمد کے مطابق عالمی سطح پر اہم معدنیات کی بڑھتی ہوئی طلب پاکستان کے لیے سرمایہ کاری اور معدنی ترقی کے نئے دروازے کھول رہی ہے۔ انہوں نے بتایا کہ پی ایم ڈی سی کو معدنیات کی تلاش اور کان کنی کے شعبے میں 150 سال سے زائد کا تجربہ حاصل ہے، اور یہ ادارہ اینٹیمنی، کرومائٹ، تانبا، آئرن اور دیگر اہم معدنیات کی تلاش کے منصوبوں پر کام کر رہا ہے۔

انجینئر اسد احمد نے مزید کہا کہ ایس آئی ایف سی کی معاونت سے معدنی شعبے میں سرمایہ کاری کے لیے ایک شفاف اور سازگار ماحول فراہم کیا جا رہا ہے، جبکہ منرلز انویسٹمنٹ فورم 2026 عالمی سرمایہ کاروں کو پاکستان کی معدنی صلاحیت سے جوڑنے کا ایک اہم پلیٹ فارم ثابت ہوگا۔ ان کے مطابق یہ فورم ملکی معدنی منصوبوں اور سرمایہ کاری کے مواقع کو عالمی سطح پر نمایاں کرنے میں مدد دے گا۔

ترکی کی کمپنی یلماز پروسیس ٹیکنالوجیز (وائی پی ٹی) کے پروسیس ڈائریکٹر ڈاکٹر چنار اورہان نے اس موقع پر کہا کہ پاکستان کے وسیع معدنی ذخائر عالمی سرمایہ کاری اور صنعتی ترقی کے لیے غیر معمولی صلاحیت رکھتے ہیں۔ انہوں نے بتایا کہ وائی پی ٹی معدنیات کی پروسیسنگ کے شعبے میں انجینئرنگ، پروکیورمنٹ، کنسٹرکشن اور مینوفیکچرنگ سمیت جامع صنعتی حل فراہم کرتی ہے۔

ڈاکٹر چنار اورہان کے مطابق گولڈ ریکوری اور جدید معدنی پروسیسنگ ٹیکنالوجی میں یورپی انجینئرنگ مہارت پاکستان کے لیے مفید ثابت ہو سکتی ہے۔ انہوں نے کہا کہ وائی پی ٹی پاکستان کے مائننگ سیکٹر میں طویل مدتی تجارتی تعلقات، ٹیکنالوجی کی منتقلی اور بین الاقوامی شراکت داری کے وسیع مواقع دیکھ رہی ہے، اور منرلز انویسٹمنٹ فورم 2026 عالمی سرمایہ کاروں کو پاکستان کی معدنی صلاحیت سے جوڑنے کا اہم ذریعہ بنے گا۔

ماہرین کے مطابق معدنی شعبے میں شفاف پالیسیوں اور جدید ٹیکنالوجی کی منتقلی سے نہ صرف غیر ملکی سرمایہ کاری میں اضافہ ہو سکتا ہے بلکہ ملکی معیشت کو بھی تقویت مل سکتی ہے۔ پاکستان کے پاس تانبے، کرومائٹ اور دیگر قیمتی معدنیات کے قابل ذکر ذخائر موجود ہیں، جن کی باقاعدہ پروسیسنگ اور برآمد سے زرمبادلہ کے ذخائر بڑھانے میں مدد مل سکتی ہے۔