مائیکروسافٹ کی عالمی سروسز میں خلل، آؤٹ لک پر صرف امریکا میں 131 ہزار سے زائد شکایات

دنیا بھر میں مائیکروسافٹ کی مختلف سروسز میں خرابی کے باعث صارفین کو شدید مشکلات کا سامنا کرنا پڑا۔ متاثرہ سروسز میں مائیکروسافٹ ٹیمز، آؤٹ لک اور کمپنی کا مصنوعی ذہانت پر مبنی سافٹ ویئر کوپائلٹ بھی شامل ہیں، جس کے نتیجے میں ای میل، پیغام رسانی اور دفتری کاموں کے لیے ان سروسز پر انحصار کرنے والے صارفین کو وقتی طور پر مسائل کا سامنا کرنا پڑا۔

مائیکروسافٹ نے جمعرات کے روز سروسز میں اس تعطل کی تصدیق کرتے ہوئے بتایا کہ کمپنی کنکشن کے مسائل کو دور کرنے کے لیے کام کر رہی ہے۔ کمپنی کے مطابق اس کے انفرااسٹرکچر کے ایک حصے پر غیر معمولی دباؤ بڑھ گیا تھا، جس کی وجہ سے صارفین کو سروسز تک رسائی میں دشواری پیش آئی۔

کمپنی کا کہنا ہے کہ یہ مسئلہ صارفین کی جانب سے ٹریفک میں اضافے کی وجہ سے پیدا نہیں ہوا، بلکہ متعدد سرورز کے اچانک دستیاب نہ ہونے کے باعث پیدا ہوا، جس سے باقی سرورز پر دباؤ میں اضافہ ہو گیا۔ مائیکروسافٹ نے مزید بتایا کہ مسئلے کے حل کے لیے سرورز کی ترتیبات میں تبدیلی کا تجربہ کیا جا رہا ہے تاکہ سرورز کی خودکار جانچ کے دوران پیدا ہونے والی خرابی کو دور کیا جا سکے۔

آؤٹیج کی نگرانی کرنے والی ویب سائٹ ڈاؤن ڈیٹیکٹر کے مطابق برطانیہ اور امریکا میں بڑی تعداد میں صارفین نے مائیکروسافٹ کی سروسز متاثر ہونے کی شکایات درج کرائیں۔ امریکا میں صرف آؤٹ لک کے حوالے سے ایک لاکھ 31 ہزار سے زائد شکایات سامنے آئیں، جو اس خلل کے وسیع پیمانے کا عندیہ دیتی ہیں۔

واضح رہے کہ یہ واقعہ ایسے وقت میں سامنے آیا ہے جب دنیا بھر میں کاروباری ادارے اور عام صارفین اپنے روزمرہ کے رابطوں اور دفتری امور کے لیے مائیکروسافٹ کی کلاؤڈ سروسز پر بھروسہ کرتے ہیں۔ ایسی صورتحال میں کسی بڑی سروس میں طویل خلل صارفین کے کام کے تسلسل اور کاروباری سرگرمیوں کو بری طرح متاثر کر سکتا ہے۔ کمپنی کی جانب سے مسئلے کی جلد از جلد اصلاح اور سروسز کی بحالی کے لیے مسلسل کوششیں جاری ہیں۔