بچیوں کی تعلیم پر خاندانوں کو اپنی آمدنی کا 13 فیصد خرچ کرنا پڑ رہا ہے

اسلام آباد میں پاکستان کولیشن فار ایجوکیشن (پی سی ای) نے ملالہ فنڈ کے اشتراک سے قومی کانفرنس برائے بچیوں کی تعلیم کا انعقاد کیا، جس میں تعلیم کے شعبے سے وابستہ ماہرین، قانون سازوں اور پالیسی سازوں نے شرکت کی۔ کانفرنس میں پیش کی گئی رپورٹ کے مطابق سرکاری سیکنڈری اسکولوں میں زیرِ تعلیم بچیوں کے خاندان ہر ماہ اوسطاً 5,899 روپے ان کی تعلیم سے متعلقہ اخراجات پر خرچ کر رہے ہیں، جو ان کی مجموعی گھریلو آمدنی کا تقریباً 13 فیصد ہے۔

آئین کے آرٹیکل 25 اے کے تحت سرکاری اسکولوں میں تعلیم مفت قرار دی گئی ہے، تاہم کانفرنس میں اس امر پر روشنی ڈالی گئی کہ سرکاری سطح پر تعلیم کے لیے مختص مالی وسائل اور خاندانوں کی جانب سے اٹھائے جانے والے حقیقی اخراجات کے درمیان واضح فرق موجود ہے۔ شرکا نے زور دیا کہ تعلیمی منصوبہ بندی اور بجٹ سازی کے عمل میں ان اخراجات کو لازمی طور پر شامل کیا جائے تاکہ کسی بچی کی تعلیم تک رسائی کا انحصار اس کے خاندان کی مالی استطاعت پر نہ ہو۔

ملالہ فنڈ کی چیف ایگزیکٹو آفیسر ڈاکٹر نشاط ریاض نے کہا کہ ہر بجٹ میں بچیوں کی تعلیم جاری رکھنے کے حقیقی اخراجات کو شامل کرنا اور ان تمام رکاوٹوں کو دور کرنا ضروری ہے جو ان کی تعلیم تک رسائی، تعلیمی عمل میں شرکت اور اگلے تعلیمی مراحل تک منتقلی کو محدود کرتی ہیں۔ پاکستان کولیشن فار ایجوکیشن کی ایگزیکٹو ڈائریکٹر زہرہ ارشد نے کہا کہ تعلیم کے لیے سرکاری مالی وسائل میں کمی کا بوجھ اب خاندانوں پر منتقل ہو گیا ہے، جس کی وجہ سے تعلیم کا حق ایک قسم کا سمجھوتہ بن کر رہ گیا ہے۔

کانفرنس کے دوران بچیوں کی قیادت میں ایک پینل مباحثہ بھی منعقد ہوا، جس میں سیکنڈری اسکولوں کی طالبات نے اپنے ذاتی تجربات بیان کرتے ہوئے ان مالی اور دیگر رکاوٹوں پر روشنی ڈالی جو ان کی تعلیم کو متاثر کرتی ہیں۔ اس نشست کی صدارت رکن قومی اسمبلی آسیہ ناز تنولی نے کی، جنہوں نے خاندانوں پر تعلیمی اخراجات کا بوجھ کم کرنے، اسکولوں کی سہولیات بہتر بنانے اور تعلیم کے شعبے میں سرکاری سرمایہ کاری بڑھانے کا مطالبہ کیا۔

پالیسی سیشن کے دوران وفاقی اور صوبائی محکمہ جات تعلیم کے نمائندوں نے مالی سال 2026-27 میں تعلیم کے شعبے میں سرمایہ کاری بڑھانے کے لیے اپنے اپنے علاقوں میں کی جانے والی کوششوں سے آگاہ کیا۔ تاہم تمام شرکا نے اس بات پر اتفاق کیا کہ تعلیمی شعبے کے اہم اہداف کے حصول میں بجٹ کی محدودیت بدستور سب سے بڑی رکاوٹ ہے۔

پنجاب کی پارلیمانی سیکرٹری برائے تعلیم اور رکن صوبائی اسمبلی نوشین عدنان نے کہا کہ تعلیم کے اہم فریقین، بشمول قانون ساز اور اعلیٰ سطح کے فیصلہ ساز، تعلیم کے معاشی پہلوؤں کو پوری طرح نہیں سمجھتے۔ انہوں نے تجویز دی کہ تعلیمی نظام کو مکمل طور پر اختیارات کی نچلی سطح تک منتقلی کے اصول پر استوار کیا جانا چاہیے تاکہ مقامی سطح پر کام کرنے والے متعلقہ افراد اپنے علاقوں کی مخصوص ضروریات اور زمینی حقائق کے مطابق آزادانہ فیصلے کر سکیں۔