لاہور میں گرین الیکٹرو بس کنڈکٹر کی جانب سے طالبہ کو دھکا دینے کا واقعہ، ملزم گرفتار

لاہور میں گرین الیکٹرو بس کے ایک کنڈکٹر کی جانب سے ایک خاتون مسافر کے ساتھ بدتمیزی اور اسے دھکا دینے کا واقعہ سامنے آیا ہے، جس کی ویڈیو سوشل میڈیا پر وائرل ہونے کے بعد حکام نے فوری کارروائی کرتے ہوئے ملزم کو حراست میں لے لیا ہے۔ یہ واقعہ شہریوں میں سخت ردعمل کا باعث بنا اور خواتین کے تحفظ سے متعلق بحث کو پھر تازہ کر گیا۔

تھانہ اچھرہ کے ایس ایچ او محمد آصف جاوید مانگٹ نے بتایا کہ گرین الیکٹرو بس میں خاتون کو دھکا دینے والے کنڈکٹر علی رضوان کو گرفتار کر کے قانونی کارروائی کا آغاز کر دیا گیا ہے۔ ملزم کو پولیس نے اپنی مدعیت میں درج مقدمے کے تحت حوالات میں بند کیا گیا ہے، اور ابتدائی معلومات کے مطابق وہ ساہیوال کا رہائشی بتایا جاتا ہے۔

لاہور پولیس کے مطابق واقعے کی فوٹیج منظرعام پر آنے کے بعد ڈی آئی جی آپریشنز لاہور فیصل کامران نے ملزم کی فوری گرفتاری کے احکامات جاری کیے۔ اس سلسلے میں ایس پی ماڈل ٹاؤن اسد علی نے ایس ایچ او اچھرہ کو خصوصی ٹاسک سونپا، جس پر کارروائی کرتے ہوئے ملزم کو مقدمے میں شامل کر کے تفتیش آگے بڑھائی جا رہی ہے۔

پولیس حکام کے مطابق ملزم نے خاتون کو بس میں سوار ہونے سے روکنے کی کوشش کی اور دھکا دیا، جبکہ فوٹیج میں بھی خاتون کے ساتھ بدسلوکی اور دھکم پیل کرتے ہوئے دیکھا جا سکتا ہے۔ واقعے کی منظرعام پر آنے کے بعد عوامی حلقوں نے ملزم کے خلاف سخت قانونی کارروائی کی توقع کا اظہار کیا۔

دوسری جانب ذرائع ابلاغ پر ملزم علی رضوان کی معافی کی ایک ویڈیو بھی سامنے آئی ہے، جس میں اس نے اپنے رویے کو غلط قرار دیتے ہوئے آئندہ ایسا نہ کرنے کا وعدہ کیا اور عوام سے معافی مانگی۔ تاہم حکام نے واضح کیا ہے کہ قانونی کارروائی بغیر کسی رعایت کے مکمل کی جائے گی۔

ڈی آئی جی آپریشنز فیصل کامران کے مطابق خواتین کا تحفظ وزیراعلیٰ پنجاب مریم نواز شریف کی اولین ترجیحات میں شامل ہے اور خواتین کے ساتھ کسی بھی قسم کی زیادتی کو ریڈ لائن قرار دیا گیا ہے۔ انھوں نے کہا کہ خواتین سے بدسلوکی کرنے والے افراد کسی رعایت کے مستحق نہیں، اور ایسے واقعات پر سخت اور شفاف کارروائی یقینی بنائی جائے گی۔