بائیڈن کا نیتن یاہو پر وعدوں کی خلاف ورزی کا الزام

امریکا کے سابق صدر جو بائیڈن نے اپنی نئی کتاب 'Promise Me, America' میں اسرائیلی وزیراعظم بنجمن نیتن یاہو پر الزام عائد کیا ہے کہ انہوں نے غزہ جنگ کے دوران شہریوں کی ہلاکتوں کو کم کرنے کے حوالے سے بار بار کیے گئے وعدوں کی خلاف ورزی کی۔ بائیڈن کے مطابق نیتن یاہو امریکی مطالبات ماننے کی یقین دہانی کراتے تھے، لیکن اس کے باوجود ایسی فوجی کارروائیاں جاری رہیں جن میں مزید فلسطینی شہری ہلاک ہوئے۔

بائیڈن نے یہ انکشاف اپنی یادداشتوں پر مشتمل 480 صفحات کی کتاب میں کیا ہے، جس کے اقتباسات امریکی میڈیا میں جاری کیے گئے ہیں۔ یہ کتاب 17 نومبر کو شائع ہوگی۔ انہوں نے لکھا کہ غزہ میں جنگ شروع ہونے کے بعد سے انہوں نے اسرائیل پر زور دیا تھا کہ وہ فوجی کارروائیوں کے دوران عام شہریوں کی جانوں کے تحفظ کے لیے مزید احتیاطی تدابیر اختیار کرے۔

سابق صدر کے مطابق انہوں نے نیتن یاہو کے ساتھ متعدد نجی ملاقاتوں اور ٹیلی فونک گفتگو میں یہ معاملہ اٹھایا۔ اسرائیلی وزیراعظم بھی تسلیم کرتے تھے کہ فلسطینی شہریوں کی بڑھتی ہوئی ہلاکتیں اسرائیل کی عالمی ساکھ اور جنگ کے لیے امریکی حمایت کو نقصان پہنچا رہی ہیں۔

واضح رہے کہ یہ انکشافات ایسے وقت سامنے آئے ہیں جب غزہ میں جاری تنازعے پر بین الاقوامی سطح پر تنقید جاری ہے اور امریکی خارجہ پالیسی میں اسرائیل کے کردار پر بحث جاری ہے۔ بائیڈن کی کتاب میں دی گئی تفصیلات سے امریکہ اور اسرائیل کے درمیان پردے کے پیچھے جاری اختلافات کی عکاسی ہوتی ہے۔