پنجاب کے اے کیو آئی ڈیش بورڈ پر آلودگی کی اصل شدت کیوں مخفی رہتی ہے؟

پنجاب حکومت کے فضائی معیار سے متعلق سرکاری ڈیش بورڈ پر ایئر کوالٹی انڈیکس (اے کیو آئی) کی زیادہ سے زیادہ حد 500 مقرر ہونے کی وجہ سے فضائی آلودگی کی اصل شدت عوام کے سامنے نہیں آ رہی۔ پنجاب انوائرمنٹل پروٹیکشن ایجنسی (ای پی اے) کا یہ ڈیش بورڈ صفر سے 500 تک کی پیمائش کرتا ہے، اور جب کسی علاقے میں آلودگی اس سطح سے بڑھ جاتی ہے تو اعداد و شمار میں کوئی اضافہ ظاہر نہیں ہوتا۔ نتیجتاً شہری یہ جاننے سے قاصر رہتے ہیں کہ ان کے علاقے میں اے کیو آئی 600، 700 یا اس سے بھی زیادہ ہو چکا ہے۔

ڈیش بورڈ پر پیمانے کو سات درجوں میں تقسیم کیا گیا ہے، جن میں اچھی، تسلی بخش، درمیانی، حساس افراد کے لیے غیر صحت بخش، غیر صحت بخش، انتہائی غیر صحت بخش اور خطرناک فضائی کیفیت شامل ہیں۔ امریکی ماحولیاتی تحفظ کے ادارے (یو ایس ای پی اے) کے مطابق 500 اے کیو آئی کی معیاری پیمائش کی بالائی حد ہے، نہ کہ فضائی آلودگی کی زیادہ سے زیادہ حد۔ اس ادارے کی جانب سے 'بیونڈ دی اے کیو آئی' کا طریقہ کار بھی بتایا گیا ہے، جس کے ذریعے 500 سے زیادہ آلودگی کو بھی نمایاں کیا جا سکتا ہے۔

ماحولیاتی امور کے وکیل التمش سعید نے کہا کہ سرکاری مانیٹرنگ نیٹ ورک کا حقیقی وقت کا ڈیٹا عوام کے لیے دستیاب کرنا اہم پیش رفت ہے، تاہم صرف ایک انڈیکس سے فضائی آلودگی کی مکمل صورتحال واضح نہیں ہوتی۔ ان کے مطابق شہریوں، محققین اور پالیسی سازوں کو مختلف آلودہ ذرات کی حقیقی مقدار اور مختلف علاقوں میں ان کی تقسیم سے متعلق معلومات بھی فراہم کی جانی چاہیے۔ پنجاب یونیورسٹی کی طالبہ نوشین فاطمہ کا کہنا تھا کہ تحقیقی اور تعلیمی مقاصد کے لیے مختلف علاقوں کی درست ریڈنگز ضروری ہیں، اور 500 پر محدود انڈیکس کی وجہ سے علاقائی سطح پر بامعنی موازنہ ممکن نہیں رہتا۔

گلبرگ کے رہائشی عبدالرحمان نے خدشہ ظاہر کیا کہ اعداد و شمار کو 500 تک محدود رکھنے سے فضائی آلودگی کی صورتحال اصل سے بہتر دکھائی دے سکتی ہے۔ تاہم پاکستان ایئر کوالٹی انیشی ایٹو (پی اے کیو آئی) سے وابستہ ماہر مریم شاہ نے واضح کیا کہ اے کیو آئی کو 500 تک محدود رکھنے کا لازمی مطلب یہ نہیں کہ ڈیٹا چھپایا جا رہا ہے۔ ان کے مطابق 500 اے کیو آئی بھی انتہائی خطرناک فضائی صورتحال کی نشاندہی کرتا ہے، جس میں شہریوں کو تمام بیرونی سرگرمیوں سے گریز کرنا چاہیے۔

مریم شاہ نے مزید بتایا کہ مختلف ممالک میں اے کیو آئی کا حساب لگانے کے طریقے مختلف ہیں اور یہ متعلقہ علاقے میں موجود نمایاں آلودہ عنصر پر منحصر ہوتا ہے۔ پاکستان اور جنوبی ایشیا کے دیگر ممالک میں فضائی آلودگی کی شدت جانچنے کے لیے پی ایم 2.5 کی حقیقی مقدار زیادہ مؤثر پیمانہ ہے، اور سرکاری ویب پورٹلز پر اس کی ریڈنگز بھی عوام کے لیے دستیاب ہونی چاہئیں۔

سینئر صوبائی وزیر مریم اورنگزیب نے موقف اختیار کیا کہ امریکا سمیت متعدد ممالک میں بھی اے کیو آئی کی حد 500 مقرر ہے اور حکومت کا ڈیٹا چھپانے کا کوئی ارادہ نہیں۔ دوسری جانب ڈبلیو ڈبلیو ایف پاکستان کے ڈائریکٹر جنرل حماد نقوی نے کہا کہ ہر شہری کو فضائی آلودگی سے متعلق درست معلومات تک رسائی کا بنیادی حق حاصل ہے تاکہ وہ اپنے علاقے کی صورتحال کے مطابق اپنی اور اپنے خاندان کی صحت کے تحفظ کے اقدامات کر سکے، اور اگر ڈیٹا 500 تک محدود رکھا گیا ہے تو ایسا نہیں ہونا چاہیے۔