کالا باغ میں کسٹمز کی کارروائی، 68 کروڑ روپے کا اسمگل شدہ سامان برآمد

پاکستان کسٹمز کی ان لینڈ انفورسمنٹ ٹیم نے مصدقہ خفیہ اطلاع کی بنیاد پر کالا باغ کے علاقے میں ایک بڑی کارروائی انجام دیتے ہوئے خفیہ ڈمپنگ اسٹیشن سے تقریباً 68 کروڑ روپے مالیت کا اسمگل شدہ سامان برآمد کر لیا ہے۔ ضبط شدہ سامان میں ایسیٹیٹ ٹو اور تمباکو شامل ہیں، جبکہ متعلقہ حکام نے سامان اپنی تحویل میں لے کر قانونی کارروائی کا آغاز کر دیا ہے۔

کسٹمز کے ترجمان کے مطابق کارروائی کے دوران 10 ہزار کلوگرام وزنی ایسیٹیٹ ٹو کے 45 بنڈلز اور 1400 کلوگرام تمباکو کے 50 سے 60 پارسلز برآمد کیے گئے۔ حکام کا کہنا ہے کہ یہ اس کلکٹریٹ کی مختصر تاریخ میں اب تک کی سب سے بڑی کارروائی ہے، جس سے اسمگلنگ میں ملوث عناصر کے طریقہ واردات کا بھی انکشاف ہوا ہے۔

ترجمان کے مطابق ڈیجیٹل انفورسمنٹ اسٹیشن پر سخت نگرانی اور کڑی چیکنگ کی وجہ سے اسمگلروں نے متبادل راستہ اختیار کیا تھا اور انفورسمنٹ اسٹیشن کے قریبی علاقے میں خفیہ ڈمپنگ سائٹ قائم کر رکھی تھی۔ اس مقام پر سامان عارضی طور پر ذخیرہ کیا جاتا اور بعد ازاں تھوڑی تھوڑی مقدار میں منتقل کر کے چیکنگ سے بچنے کی کوشش کی جاتی تھی۔

کسٹمز حکام کے مطابق بروقت کارروائی سے اسمگلنگ کی خفیہ سپلائی چین کا خاتمہ کر دیا گیا ہے، جبکہ کلکٹریٹ نے کامیاب آپریشن پر پوری انفورسمنٹ ٹیم کے لیے خصوصی انعام کا اعلان بھی کیا ہے۔

یاد رہے کہ اسمگلنگ کے خلاف کسٹمز کی یہ کارروائی ایسے وقت میں سامنے آئی ہے جب ملک میں غیر قانونی تجارت اور محصولات کی چوری کو روکنے کے لیے انفورسمنٹ اقدامات جاری ہیں۔ ماہرین کے مطابق اسمگل شدہ سامان کی روک تھام نہ صرف قومی خزانے کو تحفظ فراہم کرتی ہے بلکہ مقامی صنعت اور قانونی کاروبار کو بھی مسابقتی ماحول میں نقصان سے بچاتی ہے۔