آئی ٹی برآمدات بڑھانے کے لیے نئے منصوبے، فائبرائزیشن پروگرام پر عمل درآمد شروع

وفاقی حکومت نے انفارمیشن ٹیکنالوجی کی مصنوعات کی برآمدات میں اضافے کے لیے متعدد نئے منصوبے شروع کرنے کا فیصلہ کیا ہے۔ اس سلسلے میں وزارت انفارمیشن ٹیکنالوجی کے ذیلی ادارے اگنائٹ نے ملک بھر میں نوجوانوں کو جدید مہارتیں فراہم کرنے اور روزگار کے مواقع پیدا کرنے کے لیے مختلف پروگراموں پر کام شروع کر دیا ہے۔

اگنائٹ کے چیف ایگزیکٹو آفیسر بلال عباسی کے مطابق ملک میں فائبر کنکشنز اور ہاؤس پاسز کی تعداد بڑھانے کے لیے عالمی بینک کے تعاون سے فائبرائزیشن کے منصوبے پر عمل درآمد بھی شروع ہو چکا ہے۔ اس اقدام کا مقصد ملک میں تیز رفتار انٹرنیٹ کی دستیابی کو وسیع کرنا اور ڈیجیٹل معیشت کی بنیاد مضبوط بنانا ہے۔

انہوں نے بتایا کہ ڈیجی اسکلز پلیٹ فارم پر اب تک 58 لاکھ رجسٹریشنز مکمل ہو چکی ہیں، جبکہ سیمی کنڈکٹر، چپ ڈیزائننگ، گیمنگ اور اینیمیشن کے شعبوں میں بھی نوجوانوں کو تربیت دی جا رہی ہے۔ اس کے علاوہ چوتھی سے بارہویں جماعت تک کے طلبہ کے لیے فیوچر لیبز کے نام سے ایک پروگرام شروع کیا جا رہا ہے، جس کے تحت پروجیکٹ بیسڈ لرننگ کے ذریعے عملی تعلیم فراہم کی جائے گی۔ خودمختار مصنوعی ذہانت کے فروغ کے لیے نیشنل اے آئی انوویشن ہب پر بھی کام جاری ہے۔

بلال عباسی کے مطابق سینٹر آف ایکسیلینس فار گیمنگ اینڈ اینیمیشن کے نام سے ایک پانچ سالہ منصوبہ شروع کیا گیا ہے، جس کے تحت پری پروڈکشن، پروڈکشن، پوسٹ پروڈکشن، یونٹی، اَن ریل اور تھری ڈی ماڈلنگ سمیت چھ مختلف ٹیکنالوجیز میں کم از کم دس ہزار افراد کو تربیت فراہم کرنے کا ہدف مقرر کیا گیا ہے۔ پہلے سال کے دوران تقریباً دو ہزار افراد تربیت حاصل کر چکے ہیں۔

ایس اے پی کے شعبے میں بھی ایک سالہ تربیتی پروگرام شروع کیا گیا ہے، جس کے تحت مجموعی طور پر 2500 نوجوانوں کو تربیت دی جائے گی۔ پہلے مرحلے میں ایک ہزار جبکہ اگلے چھ ماہ میں مزید 1500 افراد کو تربیت فراہم کی جائے گی۔ عالمی مارکیٹ میں ایس اے پی کے مختلف ماڈیولز سے متعلق تقریباً ساڑھے چار لاکھ ملازمتوں کے مواقع موجود ہیں، اسی لیے اس پروگرام کو روزگار کے اہداف سے منسلک کیا گیا ہے۔

تربیت حاصل کرنے والے نوجوانوں سے 100 ڈالر فیس وصول کی جائے گی، جبکہ اس تربیت کی مارکیٹ لاگت تقریباً 1500 سے 1600 ڈالر ہے اور حکومتی سبسڈی کے بعد یہ لاگت تقریباً 1000 سے 1100 ڈالر رہ جاتی ہے۔ پروگرام کے تحت کم از کم 80 فیصد شرکاء کی سرٹیفکیشن مکمل کرانا اور سرٹیفکیشن حاصل کرنے والوں میں سے 80 فیصد کو ملازمت دلوانا معاہدے کا حصہ ہے۔ بلال عباسی نے زور دیا کہ نوجوان اپنے آئیڈیاز کو عملی مصنوعات میں تبدیل کریں، کیونکہ مقامی سطح پر عالمی معیار کی ٹیکنالوجی مصنوعات کی تیاری ہی پاکستان کی معاشی ترقی اور آئی ٹی برآمدات میں اضافے کا ذریعہ بن سکتی ہے۔