واٹس ایپ ٹیکسٹ پیغامات کے لیے ’ویو ونس‘ فیچر متعارف کرانے پر کام کر رہا ہے

واٹس ایپ صارفین کے ایک پرانے مطالبے کو پورا کرنے کی جانب ایک اہم قدم اٹھا رہا ہے۔ میٹا کی زیرِ ملکیت یہ میسجنگ ایپ اب تصاویر اور ویڈیوز کے بعد ٹیکسٹ پیغامات کے لیے بھی ’ویو ونس‘ یعنی ایک بار دیکھنے کی سہولت متعارف کرانے پر کام کر رہی ہے۔ اس فیچر کے تحت بھیجا گیا پیغام وصول کنندہ صرف ایک مرتبہ پڑھ سکے گا، جس کے بعد وہ خود بخود چیٹ سے غائب ہو جائے گا۔

واضح رہے کہ واٹس ایپ نے اگست 2021 میں تصاویر اور ویڈیوز کے لیے یہ سہولت متعارف کرائی تھی۔ اس وقت کمپنی کا کہنا تھا کہ اس فیچر کا مقصد صارفین کی نجی معلومات کو محفوظ رکھنا ہے تاکہ حساس مواد زیادہ دیر تک چیٹ میں موجود نہ رہے اور فون کی میموری پر بھی غیر ضروری بوجھ نہ پڑے۔ اب یہی سہولت ٹیکسٹ پیغامات تک بڑھائی جا رہی ہے۔

واٹس ایپ کی اپ ڈیٹس پر نظر رکھنے والی ویب سائٹ WABetaInfo کے مطابق اینڈرائیڈ ایپ کے نئے بیٹا ورژن میں ٹیکسٹ میسجز کے لیے بھی ویو ونس کا آپشن شامل کیا گیا ہے۔ اس سہولت کو خاص طور پر پاس ورڈ، کریڈٹ کارڈ کی تفصیلات، وائی فائی لاگ اِن کی معلومات اور دیگر حساس ڈیٹا شیئر کرنے کے لیے مفید قرار دیا جا رہا ہے، کیونکہ اس طرح بھیجی گئی معلومات وصول کنندہ کے ایک بار دیکھنے کے بعد محفوظ نہیں رہتیں۔

ایپ میں پہلے سے موجود ’ڈس اپیئرنگ میسجز‘ کی سہولت سے یہ نیا فیچر مختلف ہے۔ ڈس اپیئرنگ میسجز کسی مخصوص مدت کے بعد پوری چیٹ سے خود بخود حذف ہو جاتے ہیں، جبکہ نیا ویو ونس فیچر صرف ایک مخصوص ٹیکسٹ پیغام پر لاگو ہوگا اور وصول کنندہ کے اسے پہلی مرتبہ کھولنے کے بعد ہی غائب ہو جائے گا۔

رپورٹ کے مطابق اس طرح کے پیغام کو کاپی، فارورڈ یا محفوظ نہیں کیا جا سکے گا اور نہ ہی اس کا اسکرین شاٹ لینے کی سہولت دستیاب ہوگی، جس سے صارفین کی نجی معلومات کے تحفظ میں اضافہ متوقع ہے۔ فی الحال یہ فیچر صرف بیٹا صارفین کے لیے دستیاب ہے، تاہم کمپنی نے عام صارفین تک اس کی رسائی کے حوالے سے کوئی حتمی تاریخ نہیں بتائی۔

یاد رہے کہ واٹس ایپ ماضی میں بھی صارفین کی رائے اور شکایات کی بنیاد پر پرائیویسی سے متعلق متعدد فیچرز متعارف کرا چکا ہے۔ ٹیکسٹ پیغامات کے لیے ویو ونس کی افزائش کو اسی سلسلے کی ایک کڑی قرار دیا جا رہا ہے، جس سے روزمرہ ڈیجیٹل گفتگو میں حساس معلومات کے تبادلے کو زیادہ محفوظ بنانے میں مدد ملے گی۔