صدر آصف زرداری کی وزیراعظم شہباز شریف اور فیلڈ مارشل عاصم منیر کو دنیا کے 500 بااثر مسلمانوں کی فہرست میں شامل ہونے پر مبارکباد

صدر مملکت آصف علی زرداری نے وزیراعظم محمد شہباز شریف اور فیلڈ مارشل سید عاصم منیر کو دنیا کے 500 بااثر ترین مسلمانوں کی فہرست میں شامل ہونے پر دلی مبارکباد دی ہے۔ یہ فہرست اردن کے معروف ادارے رائل اسلامک اسٹریٹجک اسٹڈیز سینٹر نے جاری کی ہے اور اس میں پاکستان کی سیاسی اور عسکری قیادت کو نمایاں مقام حاصل ہوا ہے۔

سماجی رابطے کی ویب سائٹ ایکس پر جاری اپنے پیغام میں صدر مملکت نے کہا کہ وہ وزیراعظم شہباز شریف اور فیلڈ مارشل عاصم منیر کو اس اعزاز پر مبارکباد پیش کرتے ہیں۔ ان کے مطابق یہ اعزاز دونوں رہنماؤں کی قیادت اور قومی خدمات کا اعتراف ہے اور ہر پاکستانی کے لیے فخر اور مسرت کا موقع ہے۔

صدر آصف علی زرداری نے مزید کہا کہ پاکستان استحکام، مضبوطی اور عالمی سطح پر بلند تر مقام کی جانب گامزن ہے، جبکہ عالم اسلام میں پاکستان کی آواز پہلے سے زیادہ مضبوطی سے سنائی دے رہی ہے۔ انہوں نے اس کامیابی کو ملکی قیادت کے مثبت کردار اور قومی مفادات کے لیے کی جانے والی کوششوں کا نتیجہ قرار دیا۔

واضح رہے کہ رائل اسلامک اسٹریٹجک اسٹڈیز سینٹر نے 18 ویں سالانہ ایڈیشن کے تحت دنیا کے 500 بااثر مسلم شخصیات کی فہرست جاری کی ہے، جس میں وزیراعظم شہباز شریف اور فیلڈ مارشل عاصم منیر کو مشترکہ طور پر پہلی پوزیشن پر رکھا گیا ہے۔ اس فہرست میں سعودی عرب کے فرماں روا شاہ سلمان بن عبدالعزیز اور ولی عہد محمد بن سلمان کے ساتھ ساتھ ترکیہ کے صدر رجب طیب اردوان کو بھی مشترکہ طور پر پہلی پوزیشن پر جگہ دی گئی ہے۔

یہ فہرست عالم اسلام کی سیاسی، عسکری، علمی اور سماجی شخصیات کے اثر و رسوخ کا جائزہ لینے کے لیے ہر سال تیار کی جاتی ہے اور اسے بین الاقوامی سطح پر اہمیت حاصل ہے۔ پاکستانی قیادت کی اس فہرست میں شمولیت کو ملکی سطح پر قومی وقار اور بین الاقوامی شناخت سے منسلک ایک مثبت پیش رفت کے طور پر دیکھا جا رہا ہے۔