جے یو آئی کا خیبرپختونخوا میں گورنر راج اور اے آئی سے بنی مبینہ جعلی ویڈیوز کے خلاف احتجاج

خیبرپختونخوا میں جمعیت علمائے اسلام (جے یو آئی) نے صوبے کے تمام ضلعی ہیڈ کوارٹرز میں پُرامن احتجاجی مظاہروں کا انعقاد کیا، جن میں گورنر راج اور ایمرجنسی کے نفاذ کی مخالفت کے ساتھ ساتھ معدنی ذخائر سے متعلق اقدامات، انسدادِ تجاوزات کارروائیوں اور پارٹی سربراہ مولانا فضل الرحمٰن و اہلِ خانہ کے خلاف مبینہ کردار کشی کو بھی نشانہ بنایا گیا۔

ضلع پشاور میں منعقد ہونے والے مرکزی احتجاجی مظاہرے کی صدارت ضلعی امیر مولانا مفتی سید مسکین شاہ نے کی، جبکہ سینیٹر مولانا عطا الحق درویش، سابق میئر پشاور حاجی زبیر علی، ضلعی جنرل سیکرٹری مولانا احمد علی درویش اور صوبائی ترجمان حاجی عبدالجلیل جان سمیت دیگر رہنماؤں نے شرکت کی۔ شرکاء نے صوبے کے آئینی، جمہوری اور انتظامی اختیارات کے تحفظ پر زور دیتے ہوئے گورنر راج اور ایمرجنسی کے نفاذ کو مسترد کر دیا۔

مظاہرین کا کہنا تھا کہ صوبے کے معدنی ذخائر عوام کی امانت ہیں اور ان سے متعلق فیصلوں میں مقامی آبادی کے حقوق اور مفادات کو بنیادی اہمیت حاصل ہونی چاہیے، جبکہ قدرتی وسائل کو عوامی مفاد کے خلاف استعمال کرنے کی کوششیں ناقابلِ قبول ہیں۔ انہوں نے تجاوزات کے نام پر جاری کارروائیوں پر بھی تحفظات کا اظہار کرتے ہوئے کہا کہ متبادل انتظامات کے بغیر کارروائیوں سے غریب خاندان، تاجر اور محنت کش معاشی مشکلات کا شکار ہو رہے ہیں، اس لیے عوام کے جائز کاروبار اور روزگار کا تحفظ یقینی بنایا جائے۔

احتجاج کے دوران پاکستان پیپلز پارٹی کی پالیسیوں پر بھی تنقید کی گئی اور پارٹی کے ’’روٹی، کپڑا اور مکان‘‘ کے نعرے کا حوالہ دیتے ہوئے کہا گیا کہ صوبے میں گورنر راج اور ایمرجنسی سے متعلق اقدامات اس روایتی عوامی نعرے سے مطابقت نہیں رکھتے۔

مظاہرین نے جدید ٹیکنالوجی، بالخصوص مصنوعی ذہانت (اے آئی) کے ذریعے تیار کردہ مبینہ جعلی ویڈیوز اور گمراہ کن مواد کی تیاری و تشہیر کی شدید مذمت کرتے ہوئے کہا کہ سیاسی قیادت کی ساکھ متاثر کرنے اور منفی پروپیگنڈے کے لیے ٹیکنالوجی کا استعمال قابلِ مذمت ہے۔ انہوں نے ایسے مواد کی تیاری اور تشہیر میں ملوث عناصر کے خلاف قانونی کارروائی کا مطالبہ کیا۔

شرکاء نے اپنے تحفظات اور احتجاج ریکارڈ کراتے ہوئے مطالبہ کیا کہ صوبے کے وسائل، عوام کے معاشی حقوق اور سیاسی قیادت کی عزتِ نفس کا تحفظ یقینی بنایا جائے۔

خیبرپختونخوا حکومت کی جانب سے ان مطالبات پر اب تک کوئی باضابطہ ردِ عمل سامنے نہیں آیا۔

خیبرپختونخوا حکومت کی جانب سے ان مطالبات پر اب تک کوئی باضابطہ ردِ عمل سامنے نہیں آیا۔