ہری پور میں فوجی حوالدار کے قتل کا ملزم کراچی سے گرفتار

کراچی کے ضلع کیماڑی سے پولیس نے ایک مطلوب ملزم کو گرفتار کیا ہے جو خیبر پختونخوا کے ضلع ہری پور میں پاک فوج کے حوالدار اظہر خان کے قتل کے مقدمے میں مطلوب تھا۔ اینٹی وائلنٹ کرائم سیل (اے وی سی سی) کے ترجمان کے مطابق یہ گرفتاری ایس ایس پی اے وی سی سی آصف رضا بلوچ کی ہدایت پر جاری کریک ڈاؤن کے دوران خفیہ اطلاع پر کی گئی۔

پولیس کے مطابق ملزم ساجد حنیف ولد محمد حنیف ہری پور کے تھانہ بیڑ میں درج مقدمہ الزام نمبر 229/23 بجرم دفعہ 302/34 پی پی سی میں مطلوب تھا۔ وہ پاک فوج کے حوالدار اظہر خان کو قتل کر کے ہری پور سے فرار ہوا اور کراچی کے علاقے کیماڑی میں روپوش ہو گیا تھا۔

پولیس حکام کا کہنا ہے کہ گرفتار ملزم عادی جرائم پیشہ ہے اور اس سے قبل اغوا برائے تاوان کے مقدمے میں بھی جیل جا چکا ہے۔ ملزم کو مزید تفتیش اور قانونی کارروائی کے لیے ضلع ہری پور کی پولیس کے حوالے کر دیا گیا ہے۔

خیال رہے کہ ہری پور میں فوجی اہلکار کے قتل کا یہ واقعہ قانون نافذ کرنے والے اداروں کے لیے سنگین نوعیت کا حامل تھا، اور ملزم کی گرفتاری سے مقدمے کی تفتیش میں اہم پیش رفت متوقع ہے۔ پولیس نے مقدمے کی مزید تحقیقات شروع کر دی ہیں۔