آرامکو کی جازان ریفائنری میں آگ بجھا دی گئی، کوئی جانی نقصان نہیں: سعودی عرب

سعودی وزارتِ توانائی کے مطابق ملک کے جنوب مغرب میں واقع آرامکو کی جازان ریفائنری میں اتوار کی صبح لگنے والی آگ بجھا دی گئی ہے اور کوئی جانی نقصان نہیں ہوا۔

وزارت نے ایکس پر بتایا کہ کمپنی کی صنعتی سکیورٹی ٹیموں نے آگ پر قابو پا لیا جبکہ متعلقہ حکام واقعے سے نمٹنے کے اقدامات مکمل کر رہے ہیں۔ آگ کی وجہ نہیں بتائی گئی۔

بحیرۂ احمر کے کنارے یمن کی سرحد کے قریب واقع یہ ریفائنری روزانہ چار لاکھ بیرل خام تیل صاف کرتی ہے اور پیٹرول سمیت مختلف مصنوعات تیار کرتی ہے۔ آرامکو نے 27 جولائی کو حوثی حملے کے بعد اس پلانٹ کو بند کر دیا تھا۔