کراچی میں پولیس مقابلوں میں ہلاک ہونے والوں کی اموات حراستی اموات تصور کی جائیں گی

کراچی میں مبینہ پولیس مقابلوں کے دوران ہلاک ہونے والے افراد کے حوالے سے اہم ضابطہ جاری کیا گیا ہے، جس کے مطابق ایسی تمام ہلاکتوں کو حراستی اموات تصور کیا جائے گا۔ پولیس سرجن کراچی ڈاکٹر ثمیہ سید نے اس سلسلے میں مستقل دفتری حکم نامہ جاری کیا ہے تاکہ تفتیشی اور طبی مراحل میں یکسانیت اور شفافیت کو یقینی بنایا جا سکے۔

حکم نامے کے مطابق پولیس مقابلوں میں ہلاک ہونے والے ہر شخص کی لاش کا معائنہ ڈیڈ آن ارائیول پروٹوکول کے تحت کیا جائے گا۔ اسی طرح ہر کیس کا میڈیکو لیگل سرٹیفکیٹ جاری کرنا بھی لازمی قرار دیا گیا ہے، جس سے ہلاکت کی نوعیت، وقت اور متعلقہ تفصیلات کا باقاعدہ ریکارڈ محفوظ رہے گا۔

دفتری ہدایات میں یہ بھی واضح کیا گیا ہے کہ پولیس مقابلے میں ہلاک ہونے والے ہر فرد کا کیس ضابطہ فوجداری کی دفعہ 176 کے تحت عدالتی ہدایات کے حصول کے لیے مجسٹریٹ کو بھیجا جائے گا۔ اس کے علاوہ پوسٹ مارٹم ٹیم کی تشکیل کے لیے متعلقہ کیس کو پولیس سرجن کے پاس ارسال کرنا لازم ہوگا۔

حکم نامے کے مطابق ڈیڈ آن ارائیول میڈیکو لیگل سرٹیفکیٹ میں واقعے کی مکمل تفصیلات درج کرنا ضروری ہوگا۔ سرٹیفکیٹ میں لاش پر موجود اکڑن، بعد از مرگ پڑنے والے نیل کی کیفیت اور شدت، متوفی کے کپڑوں کی تفصیلات اور جسم پر زخموں کی مجموعی تعداد بھی تحریر کی جائے گی تاکہ طبی اور قانونی ریکارڈ مکمل ہو سکے۔

اس کے ساتھ ہی ہدایت کی گئی ہے کہ زخموں کی نوعیت کا تعین میڈیکو لیگال افسر نہیں کرے گا، بلکہ یہ معاملہ متعلقہ قانونی و تفتیشی عمل کے تحت رہے گا۔ لاش کے ہمراہ اسپتال آنے والے پولیس افسر کے دستخط اور اس کے شناختی کوائف بھی میڈیکو لیگل سرٹیفکیٹ کا لازمی حصہ قرار دیے گئے ہیں۔

یہ حکم نامہ ایسے وقت میں جاری کیا گیا ہے جب شہر میں پولیس مقابلوں کے دوران ہلاکتوں کے حوالے سے شفاف طریقہ کار کی ضرورت پر زور دیا جا رہا تھا۔ ماہرین کے مطابق واضح پروٹوکول اور مکمل دستاویزی ریکارڈ سے طبی و قانونی کارروائی میں اعتماد بڑھانے میں مدد ملے گی۔