فیفا صدر کے انتخاب میں نیا امیدوار: سالانہ صرف ایک ڈالر تنخواہ کی پیشکش

جنوبی افریقی صحافی اور ساؤتھمپٹن سولنٹ یونیورسٹی میں صحافت کے لیکچرار پیٹر اوف ڈیر ہائیڈ نے فیفا کے صدر جیانی انفینٹینو کے خلاف مارچ 2027 میں ہونے والے صدارتی انتخاب میں حصہ لینے کی تیاری شروع کر دی ہے۔ انہوں نے کامیابی کی صورت میں سالانہ صرف ایک ڈالر تنخواہ لینے کی تجویز پیش کی ہے۔

غیر ملکی میڈیا کے مطابق اوف ڈیر ہائیڈ ماضی میں جرمن خبر رساں ایجنسی ڈی پی اے کے اسپورٹس ایڈیٹر رہ چکے ہیں اور جنوبی افریقا میں گراہمز ٹاؤن سوکر ایسوسی ایشن کے صدر کے طور پر بھی خدمات انجام دے چکے ہیں۔ وہ 1990 کی دہائی کے آغاز میں سیکنڈ ڈویژن کلب یو ڈی ڈبلیو ایف سی کے مالک اور منتظم بھی رہے۔

بی بی سی ریڈیو سولنٹ سے گفتگو کرتے ہوئے انہوں نے کہا کہ کسی بھی انتخاب میں مقابلہ ہونا ضروری ہے اور انفینٹینو کو بھی چیلنج کیا جانا چاہیے تاکہ جواب دہی اور شفافیت کو یقینی بنایا جا سکے۔

فیفا صدارتی انتخاب میں باضابطہ امیدوار بننے کے لیے انہیں کم از کم پانچ قومی فٹبال ایسوسی ایشنز کی نامزدگی درکار ہوگی اور امیدواروں کو 18 نومبر تک انتخاب میں حصہ لینے کے ارادے کی تصدیق کرنی ہوگی۔ اوف ڈیر ہائیڈ نے کہا کہ وہ ممالک سے ووٹ نہیں بلکہ نامزدگی مانگ رہے ہیں کیونکہ باضابطہ امیدوار بننے کے بعد ہی دوسرے امیدواروں سے ایسے سوالات کیے جا سکتے ہیں جو اس سے پہلے ممکن نہیں تھے۔

انہوں نے انفینٹینو کی گزشتہ سال تقریباً 60 لاکھ ڈالر سالانہ آمدن کو غیر معقول قرار دیتے ہوئے کہا کہ فیفا صدر کے لیے ساڑھے چار لاکھ ڈالر مناسب تنخواہ ہے۔ ان کی تجویز ہے کہ وہ خود سالانہ ایک ڈالر لیں گے اور اگر چار سال کے دوران اپنے وعدے پورے کیے تو باقی رقم حاصل کریں گے۔

دوسری جانب سابق آرسنل منیجر آرسین وینگر بھی ممکنہ طور پر انتخاب لڑنے پر غور کر رہے ہیں جبکہ جاپان فٹبال ایسوسی ایشن کے اعزازی صدر کوزو تاجیما اور سابق ٹوٹنہم اور سوئٹزرلینڈ کے فٹبالر رامون ویگا کے نام بھی ممکنہ امیدواروں میں شامل ہیں۔ جیانی انفینٹینو چوتھی اور آخری مدت کے لیے صدارت کے خواہشمند ہیں اور انہوں نے دعویٰ کیا ہے کہ انہیں عالمی فٹبال برادری کی بھاری اکثریت کی حمایت حاصل ہے۔