وزیراعظم شہباز شریف اور پرنس رحیم آغا خان کی ملاقات، تعاون جاری رکھنے پر اتفاق

اقوام متحدہ کی جنرل اسمبلی کے 81ویں اجلاس کے موقع پر وزیراعظم محمد شہباز شریف اور پرنس رحیم آغا خان پنجم نے ملاقات کی۔ اس موقع پر دونوں رہنماؤں نے پاکستان کے ساتھ تعاون اور باہمی تعلقات کو مزید مضبوط بنانے پر گفتگو کی۔

وزیراعظم شہباز شریف نے پرنس رحیم آغا خان پنجم کا پرتپاک خیرمقدم کیا اور رواں سال کے اوائل میں دونوں کے درمیان ہونے والی ملاقات کو خوشگوار یادوں کے ساتھ بیان کیا۔ انہوں نے پرنس رحیم آغا خان کی جانب سے پاکستان کے ساتھ دیرینہ اور مثبت تعلقات برقرار رکھنے کے عزم کو سراہا۔

اس موقع پر وزیراعظم نے پاکستان میں اسماعیلی برادری کی سماجی و معاشی ترقی میں خدمات اور معاشرے کے لیے ان کی شہری شمولیت کی روایت کو سراہا۔ انہوں نے آغا خان ڈیولپمنٹ نیٹ ورک کے مالیاتی شمولیت، سیاحت، ثقافتی ورثہ اور مقامی آبادی کی معاشی خودمختاری کے فروغ کے لیے اقدامات کو قابل قدر قرار دیا۔

شہباز شریف نے مذکورہ شعبوں میں مزید تعاون کے مواقع پر زور دیتے ہوئے کہا کہ پاکستان میں پائیدار اور جامع ترقی کے لیے ان امکانات سے بھرپور فائدہ اٹھایا جائے۔

پرنس رحیم آغا خان نے وزیراعظم کے جذبے کا شکریہ ادا کیا اور علاقائی امن و استحکام کے لیے ان کی کوششوں کو سراہا۔ انہوں نے پاکستان اور اے کے ڈی این کے درمیان دیرینہ شراکت داری مزید مضبوط بنانے کے عزم کا اعادہ کیا۔

پرنس رحیم آغا خان نے خاص طور پر صحت، تعلیم، موسمیاتی تبدیلی سے نمٹنے اور پائیدار سماجی و اقتصادی ترقی سمیت انسانی فلاح کے شعبوں میں تعاون بڑھانے کی خواہش ظاہر کی۔

وزیراعظم شہباز شریف نے پرنس رحیم آغا خان کو پاکستان کے مزید دوروں کی دعوت دی تاکہ دوطرفہ تعاون اور دوستی مزید مستحکم ہو سکے۔