کراچی میں 350 اسکیمنگ کال سینٹرز، این سی سی آئی اے کا انکشاف
کراچی میں تقریباً 350 اسکیمنگ کال سینٹرز کام کر رہے ہیں، حالیہ کارروائی میں 273 افراد گرفتار اور 339 لیپ ٹاپ ضبط کیے گئے جن میں غیر ملکی شہریوں کا ڈیٹا موجود تھا۔
کراچی میں سائبر کرائم کے بڑھتے ہوئے واقعات کے درمیان نیشنل سائبر کرائم investigation ایجنسی (این سی سی آئی اے) نے انکشاف کیا ہے کہ شہر میں اندازاً 350 اسکیمنگ کال سینٹرز فعال ہیں۔ ایجنسی کے ایڈیشنل ڈائریکٹر شہزاد اکبر نے پریس کانفرنس میں بتایا کہ حال ہی میں شارع فیصل پر واقع ایک بڑی کال سینٹر کمپنی کے خلاف کارروائی کی گئی، جس کے دوران 100 خواتین اور 42 کم عمر افراد سمیت کل 273 افراد کو گرفتار کیا گیا۔
انہوں نے بتایا کہ ضبط کیے گئے 339 لیپ ٹاپس میں سے ہر ایک پر مختلف جعلی آن لائن شناختیں بنائی گئی تھیں، جبکہ ان میں کریڈٹ کارڈ رکھنے والے افراد کی اہم مالی معلومات بھی محفوظ تھیں۔ کارروائی کے دوران 152 موبائل فون اور 4 سی پی یو بھی تحویل میں لیے گئے۔ ملزمان مبینہ طور پر پرکشش آفرز اور جھانسے دے کر کریڈٹ کارڈ ہولڈرز کی تفصیلات حاصل کرتے اور ان کے اکاؤنٹس سے رقوم نکال لیتے تھے۔
شہزاد اکبر کے مطابق ضبط شدہ لیپ ٹاپس سے ہزاروں غیر ملکی شہریوں کا ڈیٹا بھی ملا ہے، جس کی بنیاد پر مزید تحقیقات جاری ہیں۔ انکشاف ہوا ہے کہ کال سینٹرز کی سرگرمیوں میں منی لانڈرنگ، حوالہ ہنڈی اور مرچنٹ نیٹ ورکس کے ملوث ہونے کے شواہد بھی سامنے آئے ہیں۔ انہوں نے بتایا کہ صرف بین الاقوامی سطح پر ہی نہیں بلکہ مقامی شہریوں کو بھی نشانہ بنایا گیا، اور ریٹائرڈ افراد کو بھی دھوکے سے لوٹنے کے شواہد ملے ہیں۔
ایجنسی نے ماضی میں صرف مالکان کے خلاف کارروائی پر تنقید کرتے ہوئے کہا کہ یہ طریقہ کار کافی نہیں تھا، کیونکہ ایک گروپ کی گرفتاری کے بعد اس کے رشتہ دار نام تبدیل کر کے نئی کمپنی قائم کر لیتے اور دوبارہ یہی سرگرمیاں شروع کر دیتے تھے۔ اب پورے نیٹ ورک کے خلاف مقدمہ درج کیا گیا ہے اور ملازمین کو بھی رعایت نہیں دی جائے گی۔ والدین کو بھی خبردار کیا گیا ہے کہ اگر وہ اپنے بچوں کو غیر قانونی کاموں سے نہیں روکتے تو ان کے خلاف دفعہ 109 کے تحت کارروائی کی جا سکتی ہے۔
پریس کانفرنس میں بتایا گیا کہ این سی سی آئی اے نے ڈارک ویب سے متعلق ایک کیس میں متاثرہ بچی کی بازیابی سمیت دیگر کارروائیاں بھی کی ہیں، جبکہ یونیورسٹیوں میں آن لائن منشیات کی فراہمی کے خلاف کریک ڈاؤن جاری ہے جس میں دو افراد گرفتار کیے گئے۔ آن لائن ملازمتوں کے نام پر فراڈ اور جاز کیش کے ذریعے جعلسازی کی رقم منتقل کرنے کے واقعات کی بھی تحقیقات کی جا رہی ہیں۔
