عالمی سمندروں میں ریکارڈ گرمی، سطح سمندر میں تیزی سے اضافہ

دنیا بھر کے سمندروں کی حالت ماحولیاتی تبدیلیوں کا اہم پیمانہ سمجھی جاتی ہے، اور تازہ رپورٹ کے مطابق گزشتہ سال عالمی سمندروں نے تئیس زیٹا جولز کے برابر حرارت جذب کی۔ واضح رہے کہ ایک زیٹا جول میں ایک بلین ٹریلین جول ہوتے ہیں، اور یہ مقدار انسانوں کی استعمال کردہ دیگر تمام توانائی کے ذرائع سے تقریباً چالیس گنا زیادہ ہے۔ اس غیر معمولی حرارت نے سمندروں کو نہ صرف گرم بلکہ بلند اور زیادہ متاثر کن بنا دیا ہے۔

کوپرنیکس اوشین اسٹیٹ رپورٹ کے مطابق 1999 سے سمندر کی سطح میں ہر سال اوسطاً 3.8 ملی میٹر اضافہ ریکارڈ کیا جا رہا ہے، جبکہ 2012 سے 2025 کے درمیان یہ رفتار 4.8 ملی میٹر سالانہ تک تیز ہونے کا امکان ہے۔ اسی طرح گزشتہ چالیس برسوں میں عالمی سمندر 17 فیصد زیادہ تیزابی ہو چکے ہیں، جو سمندری حیات کے لیے سنگین خطرہ ہے۔

رپورٹ کے مطابق سمندروں نے انسانوں کی خارج کردہ کاربن ڈائی آکسائیڈ کا تقریباً ایک تہائی حصہ اور گرین ہاؤس گیسوں سے پیدا ہونے والی نوے فیصد حرارت جذب کر لی ہے۔ ماہرین کا کہنا ہے کہ یہ تبدیلیاں آنکھوں کے سامنے رونما ہو رہی ہیں، اور سطح سمندر میں اضافہ، گرمی اور ماحولیاتی نظام کی تنزلی ایک دوسرے سے جڑے ہوئے طویل مدتی عمل کی نشاندہی کرتے ہیں۔

یورپ عالمی اوسط سے دوگنا تیز رفتار سے گرم ہو رہا ہے۔ سائنسدانوں کے مطابق ایک ماہ سے زائد عرصے تک جاری رہنے والی ریکارڈ توڑ سمندری گرمی کی لہریں بحیرہ روم اور بحیرہ اسود کی سطح کے نیچے بڑھتے ہوئے درجہ حرارت کا نتیجہ ہیں۔ مشرق میں معمولی بہتری کے باوجود مغربی بحیرہ روم میں سطح سمندر میں اضافے کے واضح آثار ملے ہیں، جس سے گرمی کی لہریں مزید شدت اختیار کر رہی ہیں۔

یہ رپورٹ ایسے وقت سامنے آئی ہے جب مغربی یورپ تباہ کن موسم گرما کے بعد غیر معمولی گرم ستمبر کا سامنا کر رہا ہے، اور اسپین و پرتگال میں درجہ حرارت چالیس ڈگری سیلسیس تک پہنچ گیا تھا۔ باسک ریسرچ انسٹی ٹیوٹ کے میرین ایکولوجسٹ اینجل بورجا کا کہنا ہے کہ یہ اثرات برسوں سے نظر آ رہے ہیں اور آئندہ مزید بڑھیں گے، تاہم معاشرہ اس مسئلے کو کم سمجھ رہا ہے۔ انہوں نے مثال دی کہ بڑھتی سطح سمندر اور انتہائی موسمی واقعات بحیرہ اسود کی ساحلی پٹی کو کھا رہے ہیں، پھر بھی کچھ حلقے ایسی تعمیرات دوبارہ کرنے پر اصرار کر رہے ہیں جو یقینی طور پر ختم ہو جائیں گی۔

رپورٹ میں گرمی سے سمندری حیات کو پہنچنے والے نقصان کا تفصیلی جائزہ بھی پیش کیا گیا ہے۔ جنوری 2023 سے ستمبر 2025 کے درمیان دنیا کی 84 فیصد مرجان کی چٹانیں یا ساحلی چٹانیں گرمی کے دباؤ کے باعث اپنا رنگ کھو چکی ہیں، جو سمندری ماحولیاتی نظام کے لیے خطرے کی گھنٹی ہے۔