ایف بی آر کا پیک شدہ چائے کی پیداوار پر الیکٹرانک نگرانی لازمی قرار دینے کا فیصلہ

فیڈرل بورڈ آف ریونیو (ایف بی آر) نے پیک شدہ چائے کی پیداوار اور فروخت کی نگرانی کے لیے الیکٹرانک مانیٹرنگ سسٹم لازمی قرار دیا ہے۔ اس فیصلے کا مقصد چائے کے کاروبار میں ٹیکس چوری کو روکنا اور پیداوار کے اعداد و شمار کو شفاف بنانا ہے۔ اس سلسلے میں ایف بی آر نے سیلز ٹیکس جنرل آرڈر جاری کر دیا ہے، جس کے تحت چائے کے ہر ریٹیل پیک پر مشین سے پڑھا جانے والا بارکوڈ لگانا لازمی ہوگا۔

نئی ہدایات کے مطابق ملک بھر میں چائے کی تیاری، مختلف اقسام کی آمیزش اور ریٹیل پیکنگ میں مصروف تمام رجسٹرڈ اداروں، بشمول ٹول اور کنٹریکٹ پیکرز، کو 10 دسمبر تک مقررہ الیکٹرانک پروڈکشن مانیٹرنگ سسٹم نصب اور فعال کرنا ہوگا۔ یہ احکامات بلیک ٹی، گرین ٹی، فلیورڈ ٹی، ٹی بیگز، انسٹنٹ ٹی، چائے کے عرق اور چائے پر مشتمل مختلف پری مکسز سمیت ہر قسم کی پیک شدہ چائے پر لاگو ہوں گے۔

ایف بی آر کے مطابق ہر مینوفیکچرنگ اور پیکنگ یونٹ کی ہر پیکنگ لائن پر مناسب ہارڈویئر اور سافٹ ویئر نصب کیا جائے گا، جو ہر ریٹیل پیک پر موجود بارکوڈ اسکین کرکے اس کی شناخت اور تعداد کا ریکارڈ مرتب کرے گا۔ چائے کی پیداوار اور پیکنگ کا ڈیٹا فوری طور پر ایف بی آر کو منتقل ہوگا اور الیکٹرانک نگرانی کے بغیر پیکجڈ چائے فیکٹری سے باہر نہیں لے جائی جا سکے گی۔

کمپنیوں کو ہر برانڈ، وزن اور پیکنگ کے لیے الگ بارکوڈ رجسٹر کرانا ہوگا اور یہ رجسٹریشن ایف بی آر کے منظور شدہ وینڈر کے پاس کرائی جائے گی۔ نئی مصنوعات یا موجودہ مصنوعات میں کسی تبدیلی کی صورت میں تفصیلات پیکنگ سے کم از کم سات روز قبل رجسٹر کرانا ضروری ہوگا۔ جن اداروں کی مصنوعات پر بارکوڈ موجود نہیں یا ایک ہی بارکوڈ مختلف مصنوعات کے لیے استعمال ہو رہا ہے، انہیں حکم کے اجرا کے 15 دن کے اندر ہر منفرد پروڈکٹ کے لیے الگ بارکوڈ مختص کرنے کی ہدایت دی گئی ہے۔

بارکوڈ کو پیکٹ پر نمایاں اور اسکین کے قابل جگہ پر پرنٹ یا پائیدار لیبل کے ذریعے چسپاں کرنا ہوگا، جبکہ برانڈ، آمیزش، وزن، پیکنگ کی قسم، ریٹیل قیمت، بارکوڈ نمبر اور پیکٹ کی تصویر سمیت تمام تفصیلات رجسٹر کرانا لازمی قرار دیا گیا ہے۔ بارکوڈ ہٹانے، چھپانے یا تبدیل کرنے پر بھی پابندی عائد کر دی گئی ہے۔

دستی طریقے سے پیکنگ کرنے والی کمپنیوں کو بھی کنویئر یا مخصوص اسکیننگ پوائنٹ قائم کرنا ہوگا تاکہ ہر پیکٹ کی گنتی اور مانیٹرنگ ممکن ہو سکے۔ غیر رجسٹرڈ بارکوڈ والے چائے کے پیکٹ تیار کرنے کی اجازت نہیں ہوگی، جس سے چائے کی صنعت میں پیداوار اور فروخت کی ریکارڈنگ زیادہ منظم ہونے کی توقع ہے۔