سندھ میں تھرڈ پارٹی موٹر انشورنس میں 40 گنا اضافہ

سندھ حکومت نے سیکیورٹیز اینڈ ایکسچینج کمیشن آف پاکستان (SECP) کے تعاون سے موٹر وہیکل قانون میں ترامیم کیں جن کے تحت مارچ 2024 سے تھرڈ پارٹی موٹر انشورنس کو لازمی قرار دیا گیا۔ اس اقدام کے نتیجے میں نومبر 2024 تک ایسی پالیسیوں کی تعداد میں تقریباً 40 گنا اضافہ ریکارڈ کیا گیا ہے۔

اعداد و شمار کے مطابق نومبر 2024 تک تھرڈ پارٹی موٹر انشورنس پالیسیوں کی تعداد بڑھ کر 4 لاکھ 52 ہزار 515 ہو گئی، جو مارچ 2024 میں صرف 11 ہزار 200 تھی۔ یہ تقریباً 3,940 فیصد یا 40 گنا اضافہ ہے۔ اس اضافے کو قانون پر عمل درآمد اور سڑک استعمال کرنے والوں کے تحفظ کے لیے اہم پیش رفت قرار دیا جا رہا ہے۔

لازمی تھرڈ پارٹی موٹر انشورنس پر عمل درآمد میں معاونت کے لیے سینٹرل ڈیپازٹری کمپنی (CDC) نے موٹر انشورنس ریپوزٹری قائم کی ہے جو انشورنس پالیسیوں کی ڈیجیٹل تصدیق کی سہولت فراہم کرتی ہے۔ یہ ریپوزٹری سندھ کے محکمۂ رجسٹریشن و ٹیکس برائے گاڑیاں سے منسلک ہے۔ تھرڈ پارٹی موٹر انشورنس سڑک حادثات سے متاثرہ افراد کو مالی تحفظ فراہم کرتی ہے اور پالیسی کی شرائط کے تحت حادثے کی صورت میں دوسروں کو پہنچنے والی چوٹ، موت یا املاک کے نقصان کی ذمہ داری کا احاطہ کرتی ہے۔ البتہ اس میں پالیسی ہولڈر کی اپنی گاڑی کو پہنچنے والا نقصان شامل نہیں ہوتا۔

سندھ میں تقریباً 26 لاکھ گاڑیاں رجسٹرڈ ہیں، اس لیے انشورنس کوریج میں مزید اضافے کی گنجائش موجود ہے۔ ماہرین کے مطابق اس رفتار کو برقرار رکھنے کے لیے عوامی آگاہی، موثر نفاذ اور قابلِ رسائی انشورنس مصنوعات اہم کردار ادا کر سکتی ہیں۔

ایس ای سی پی کے چیئرمین ڈاکٹر کبیر احمد سدھو نے کہا ہے کہ تھرڈ پارٹی موٹر انشورنس سڑک حادثات کے متاثرین اور ان کے اہلِ خانہ کو حادثے کی صورت میں ضروری معاوضہ فراہم کرتی ہے۔ انہوں نے بتایا کہ سندھ میں ہونے والی پیش رفت کی بنیاد پر وفاقی حکومت اور پنجاب سمیت دیگر صوبائی حکومتوں سے رابطے میں ہیں تاکہ اس اہم قانون سازی کو پورے پاکستان میں نافذ کیا جا سکے۔