بنوں میں پولیس چوکی پر حملہ ناکام، چار حملہ آور ہلاک

خیبرپختونخوا کے ضلع بنوں میں پولیس چوکی کنگر پل پر گزشتہ نصف شب دہشت گردوں کی جانب سے حملہ کرنے کی کوشش ناکام بنا دی گئی۔ پولیس کے مطابق چوکی پر تعینات اہلکاروں نے بروقت اور مؤثر جوابی کارروائی کی، جس کے نتیجے میں چار حملہ آور ہلاک ہوگئے اور واقعے میں پولیس اہلکار محفوظ رہے۔

حملے کی اطلاع ملنے کے بعد کمک کے لیے تازہ دم دستے، کوئیک رسپانس فورس اور انسداد دہشت گردی محکمے کی ٹیمیں موقع پر پہنچیں اور کلیئرنس آپریشن مکمل کیا۔ حکام کے مطابق ہلاک حملہ آوروں کے قبضے سے اسلحہ اور گولہ بارود بھی برآمد ہوا ہے، جبکہ ان کی شناخت کے لیے کارروائی جاری ہے۔

خیبرپختونخوا کے انسپکٹر جنرل پولیس ذوالفقار حمید نے بنوں پولیس کی کارکردگی کو سراہتے ہوئے کہا کہ رات کی تاریکی میں حملے کو کامیابی سے پسپا کرنا پولیس اہلکاروں کی بہترین تربیت اور پیشہ ورانہ مہارت کا ثبوت ہے۔ انہوں نے کہا کہ صوبے کی سرزمین پر دہشت گردی کے لیے کوئی گنجائش نہیں رکھی جائے گی اور امن و امان کو ہر قیمت پر یقینی بنایا جائے گا۔

وفاقی وزیر داخلہ محسن نقوی نے بھی اس موقع پر پولیس اور انسداد دہشت گردی محکمے کی پیشہ ورانہ صلاحیتوں کو خراج تحسین پیش کیا۔ انہوں نے کہا کہ خیبرپختونخوا پولیس کے جوانوں نے بہادری سے حملے کا مقابلہ کیا اور صوبے میں قیام امن کے لیے ان کی کاوشیں قابلِ ستائش ہیں۔

واضح رہے کہ خیبرپختونخوا کے مختلف اضلاع میں پولیس چوکیوں اور سیکیورٹی فورسز کو نشانہ بنانے کی کوششیں گزشتہ کچھ عرصے میں جاری ہیں، جنہیں سیکیورٹی ادارے بروقت کارروائی کے ذریعے ناکام بناتے رہے ہیں۔ حکام کا کہنا ہے کہ ایسی کوششوں کے خلاف انٹیلیجنس بنیادوں پر کارروائیاں جاری رکھی جائیں گی۔