ضیاء الرحمٰن کی ویلتھ اسٹیٹمنٹ میں مالی تضادات سامنے آئے

جمعیت علمائے اسلام (ف) کے سربراہ مولانا فضل الرحمان کے بھائی اور پارٹی کے مرکزی رہنما ضیاء الرحمٰن کی ویلتھ اسٹیٹمنٹ میں کئی مالی سوالات اور غیر معمولی تضادات سامنے آئے ہیں۔ ذرائع کے مطابق ان کے ظاہر کردہ اثاثوں اور آمدن کے اعداد و شمار میں ایسی تفصیلات شامل ہیں جن کی شفاف وضاحت نہیں دی گئی۔

ویلتھ اسٹیٹمنٹ کے مطابق ضیاء الرحمٰن نے 2022ء میں اہلیہ کے والد سے ایک کروڑ 25 لاکھ روپے نقد وصول کرنے کا اندراج کیا ہے۔ اس حوالے سے یہ سوال اٹھایا گیا ہے کہ یہ رقم کس مد میں اور کس ذریعے سے حاصل ہوئی، اور اس کی وصولی کا بینکنگ ریکارڈ، تحریری معاہدہ یا کوئی قانونی دستاویز کہاں موجود ہے۔

اثاثوں کی تفصیلات میں 375 کنال وراثتی زرعی اراضی بھی ظاہر کی گئی ہے، تاہم اس کی مالیت مسلسل پانچ سال صفر درج رہی۔ اسی طرح ڈی آئی خان میں دو کنال کے رہائشی گھر کی مالیت 2011ء سے 2025ء تک مسلسل 75 لاکھ 90 ہزار روپے ہی ظاہر کی گئی ہے۔ ایک کنال آٹھ مرلہ رہائشی زمین کی مالیت بھی 2011-12 سے 2025ء تک صرف 72 ہزار روپے برقرار رہی، جبکہ میانوالی کے علاقے عیسیٰ خیل میں ساڑھے تین کنال سے زائد زرعی اراضی کی مالیت صرف ایک لاکھ 80 ہزار روپے بتائی گئی ہے۔

کاروباری معاملات کے حوالے سے 2025ء میں پراپرٹی ایڈوائزر کے کاروبار کا سرمایہ صرف پانچ لاکھ روپے جبکہ کاروباری آمدن 16 لاکھ 50 ہزار روپے ظاہر کی گئی ہے۔ اسی طرح 2024ء میں 66 لاکھ 46 ہزار روپے سے زائد تنخواہ ڈپازٹ کا اندراج بھی موجود ہے، جس کے بارے میں یہ معلوم کرنا ضروری قرار دیا جا رہا ہے کہ یہ رقم کس ادارے سے، کس ملازمت کے عوض اور کس بینک اکاؤنٹ میں وصول ہوئی۔

رپورٹ میں یہ نکتہ بھی اٹھایا گیا ہے کہ عوام کو یہ حق حاصل ہے کہ عوامی عہدوں سے وابستہ افراد کے ظاہر کردہ اثاثوں، آمدن، بینک بیلنس اور جائیدادوں کی مکمل دستاویزی تفصیلات سامنے آئیں تاکہ مالی شفافیت کو یقینی بنایا جا سکے۔

واضح رہے کہ مذکورہ سوالات ویلتھ اسٹیٹمنٹ میں درج اعداد و شمار کی بنیاد پر اٹھائے گئے ہیں، اور متعلقہ شخص کی طرف سے ان کی دستاویزی وضاحت ابھی سامنے نہیں آئی۔ ایسی مالیاتی معلومات کی تصدیق متعلقہ اداروں اور دستاویزات کی جانچ کے بعد ہی ممکن ہے۔