چین کا پہلا برقی مسافر طیارہ سی ای 25 اے کامیابی سے آزمائشی پرواز مکمل کرنے میں کامیاب

چین نے برقی ہوابازی کے میدان میں ایک اہم سنگ میل عبور کرتے ہوئے اپنا پہلا مقامی طور پر تیار کردہ برقی مسافر طیارہ کامیابی سے آزمائشی پرواز کے لیے اڑا دیا ہے۔ یہ طیارہ چینی سرکاری فضائی کمپنی کامیک نے تیار کیا ہے اور اس کا نام سی ای 25 اے ہے، جس نے 14 نومبر کو صوبہ شان ڈونگ کے شہر بن ژو سے اپنی پہلی آزمائشی پرواز مکمل کی۔ اس پرواز میں دو پائلٹ اور ایک فلائٹ ٹیسٹ انجینئر سوار تھے۔

رپورٹس کے مطابق طیارہ ہوا میں 16 منٹ اور 38 سیکنڈ تک رہا اور اس دوران اس نے 60.4 کلومیٹر کا فاصلہ طے کیا۔ آزمائشی پرواز سمیت زمین پر کی گئی تمام کارروائیوں کا مجموعی دورانیہ 57 منٹ اور 46 سیکنڈ رہا۔ سی ای 25 اے کا زیادہ سے زیادہ ٹیک آف وزن 10 میٹرک ٹن ہے اور یہ عملے کے علاوہ 19 مسافروں کو لے جانے کی صلاحیت رکھتا ہے۔

اس طیارے کی خاص بات اس کے پروں پر نصب 10 برقی ڈکٹڈ پنکھے ہیں، جبکہ اس کی متوقع پروازی حد 400 کلومیٹر اور رفتار 300 کلومیٹر فی گھنٹہ بتائی گئی ہے۔ چینی میڈیا کے مطابق پائلٹ کے ساتھ پہلی پرواز سے قبل اس طیارے نے فروری 2026 سے اب تک 19 بغیر پائلٹ آزمائشی پروازیں بھی کامیابی سے مکمل کی ہیں، جو اس ٹیکنالوجی کی مضبوطی کو ظاہر کرتی ہیں۔

اس منصوبے میں چین کی معروف بیٹری ساز کمپنی سی اے ٹی ایل اور شنگھائی جیاو ٹونگ یونیورسٹی بھی شریک ہیں۔ تاہم کامیک نے اب تک یہ واضح نہیں کیا کہ طیارے میں کون سی بیٹری استعمال کی گئی ہے۔ چین نے 2023 میں اس طیارے کا تصور متعارف کرایا تھا، جبکہ اس کا مکمل حجم والا ماڈل پہلی بار اکتوبر 2026 میں منظرعام پر آیا۔ اطلاعات کے مطابق کمپنی نے طیارے کے سرٹیفکیشن کے لیے چینی سول ایوی ایشن اتھارٹی سے بھی رجوع کر لیا ہے۔

یہ پیش رفت برقی ہوا بازی کے شعبے میں چین کی بڑھتی ہوئی دلچسپی اور عالمی فضائی صنعت میں نئی ٹیکنالوجی متعارف کرانے کی کوششوں کو ظاہر کرتی ہے۔ ماہرین کے مطابق برقی طیارے مستقبل میں مختصر فاصلے کی پروازوں کے لیے ماحول دوست اور کم خرچ متبادل ثابت ہو سکتے ہیں، جس سے فضائی سفر کے شعبے میں کاربن کے اخراج کو کم کرنے میں مدد مل سکتی ہے۔