around.pk
Wednesday, 18 November 2026
☀ کراچی 32°☀ لاہور 23°☀ اسلام آباد 18°
پاکستان

خیبر پختونخوا: تعلیم سے محروم بچوں کے لیے 12 اضلاع میں خصوصی داخلہ مہم کا فیصلہ

گورنر ہاؤس پشاور میں محکمہ تعلیم کی خصوصی بریفنگ میں 12 ہنگامی اضلاع میں داخلہ مہم، اسکولوں کی سولرائزیشن اور 92 ترقیاتی منصوبوں سمیت تعلیمی اصلاحات کا جائزہ لیا گیا۔

around.pk·7m ago

خیبر پختونخوا حکومت نے صوبے میں تعلیم سے محروم بچوں کو اسکولوں تک لانے کے لیے 12 ہنگامی اضلاع میں خصوصی داخلہ مہم شروع کرنے کا فیصلہ کیا ہے۔ یہ فیصلہ گورنر ہاؤس پشاور میں محکمہ تعلیم کی صورتحال پر منعقدہ ایک خصوصی بریفنگ کے دوران کیا گیا، جس میں گورنر خیبر پختونخوا فیصل کریم کنڈی، صوبائی ایڈوائزر برائے تعلیم ڈاکٹر سید عامر عبداللہ، اعلیٰ سول افسران اور میڈیا کے نمائندوں نے شرکت کی۔

بریفنگ میں ایڈوائزر تعلیم نے صوبے کے تعلیمی نظام کی موجودہ صورتحال، اصلاحاتی اقدامات، انتظامی امور اور مستقبل کے منصوبوں پر تفصیلی معلومات فراہم کیں۔ انہوں نے بتایا کہ حکومت تعلیمی نظام میں بہتری، سرکاری اداروں کی کارکردگی میں اضافے اور گورننس کو مؤثر بنانے کے لیے مسلسل اصلاحات کر رہی ہے، جن میں انتظامی اصلاحات، مالی نظم و ضبط، ڈیجیٹلائزیشن اور تعلیمی سہولیات کی فراہمی کو ترجیح دی جا رہی ہے۔

صوبے کے 34 ہزار 848 سرکاری اسکولوں میں تقریباً 59 لاکھ 60 ہزار طلبہ زیر تعلیم ہیں، جبکہ ایک لاکھ 87 ہزار سے زائد اساتذہ خدمات انجام دے رہے ہیں۔ اساتذہ کی منصفانہ تقسیم اور میرٹ کو یقینی بنانے کے لیے ای ٹرانسفر پالیسی کا مسودہ تیار کر لیا گیا ہے، جبکہ سنگل ٹیچر اور اضافی اساتذہ والے اسکولوں کی فہرستیں بھی مرتب کی گئی ہیں۔ اسکول سربراہان کی کارکردگی جانچنے کی مشق مکمل کی جا چکی ہے اور اساتذہ کی حاضری و تربیت کی ریئل ٹائم مانیٹرنگ کا نظام تیار کیا جا رہا ہے۔

غیر فعال اسکولوں کی بحالی کے لیے ریشنلائزیشن کے ساتھ ساتھ دوسرے مرحلے میں 1,500 اسکولوں کی آؤٹ سورسنگ کی ہدایات بھی جاری کی گئی ہیں۔ تعلیم سے محروم بچوں کو اسکولوں میں لانے کے لیے 12 ہنگامی اضلاع میں خصوصی داخلہ مہم چلائی جائے گی، جس کے لیے سروے ٹولز، ہیٹ میپس اور ڈیٹا شیئرنگ پر کام جاری ہے۔ ان اضلاع کے اسکولوں میں بنیادی سہولیات کی فراہمی کے لیے فوری اقدامات کی ہدایات دی گئی ہیں، جبکہ غیر محفوظ عمارتوں کے مسائل متعلقہ حکام کو بھجوائے گئے ہیں۔

ترقیاتی منصوبوں کے حوالے سے بتایا گیا کہ 100 روزہ تعلیمی منصوبے کے تحت 61 منصوبوں کے لیے 79 کروڑ روپے جبکہ 180 روزہ منصوبے کے تحت 31 منصوبوں کے لیے 5 ارب روپے مختص کیے گئے ہیں۔ مجموعی طور پر 92 منصوبوں کا بجٹ 5 ارب 79 کروڑ روپے بنتا ہے، جن میں 424 اسکولوں کی سولرائزیشن، 15 اسکولوں کو ماڈل اسکولز میں تبدیل کرنا، آئی ٹی لیبارٹریز کا قیام اور طالبات کے اسکولوں کی اپ گریڈیشن شامل ہے۔

اعلیٰ تعلیم کے شعبے میں 34 سرکاری جامعات میں ایک لاکھ 97 ہزار سے زائد اور 388 سرکاری کالجز میں تقریباً 2 لاکھ 80 ہزار طلبہ زیر تعلیم ہیں۔ جامعات کی مالیاتی بہتری اور انتظامی شفافیت کے لیے اعلیٰ سطحی ورکنگ گروپ تشکیل دیا گیا ہے جو مالی خسارے، گورننس اور وسائل کے مؤثر استعمال کا جائزہ لے رہا ہے، جبکہ ہائر ایجوکیشن کمیشن سے 18 ارب روپے کی معاونت کے لیے بھی رابطہ کیا گیا ہے۔ اس کے علاوہ تعلیمی انٹرنشپ پروگرام کے تحت 500 انٹرنز متعارف کرانے، پاراچنار میں خصوصی بچوں کے اسکول اور جدید معاون آلات کی فراہمی، قبائلی اضلاع میں اساتذہ کی تربیت اور فنی و ڈیجیٹل مہارتوں کے فروغ پر بھی کام جاری ہے۔

اب تک کی کہانی ہائر ایجوکیشن کمیشن

  1. تعلیمی اداروں میں طالبات کے ساتھ ہراسانی کی شرح 75 فیصد تک پہنچ گئی
  2. پاکستانی طلبہ کا رجحان: 81 فیصد کی پہلی پسند کمپیوٹر سائنس، آئی ٹی اور اے آئی
  3. خیبرپختونخوا کی 26 سرکاری جامعات خسارے میں، وفاق سے 18 ارب روپے گرانٹ کا مطالبہ
پوری ٹائم لائن دیکھیں →
خیبر پختونخواپشاورفیصل کریم کنڈیہائر ایجوکیشن کمیشنمحکمہ ابتدائی و ثانوی تعلیمگورنر ہاؤس پشاورسید عامر عبداللہ

اسی موضوع پر مزید

سب دیکھیں →

مزید پڑھیں