اسلام آباد پولیس کے قبضے میں ایک ہزار سے زائد گڈز ٹرانسپورٹ گاڑیاں

آل پاکستان گڈز ٹرانسپورٹ اونرز ایسوسی ایشن کے صدر اویس چوہدری ایڈووکیٹ نے اپنے بیان میں کہا ہے کہ اسلام آباد میں گڈز ٹرانسپورٹرز کی ایک ہزار سے زیادہ گاڑیاں تقریباً دو ہفتوں سے پولیس کے قبضے میں ہیں۔

اویس چوہدری کا کہنا تھا کہ ان گاڑیوں میں کنٹینرائزڈ کارگو، فلیٹ بیڈ، اوپن باڈی، دس ویلر اور مزدا شامل ہیں۔ ان میں سے بیشتر گاڑیاں لوڈ ہیں اور انہیں مختلف چوراہوں پر کھڑا کیا گیا ہے۔

انہوں نے اس تاثر کو غلط قرار دیا کہ گاڑیاں کرائے پر حاصل کی گئی ہیں اور یومیہ 20 ہزار روپے کا کوئی معاہدہ نہیں ہوا۔ اویس چوہدری نے وضاحت کی کہ اب تک کسی بھی ٹرانسپورٹر کو کوئی معاوضہ بھی ادا نہیں کیا گیا۔

اویس چوہدری نے یہ بھی کہا کہ 2022 میں بھی اسی طرح گاڑیاں پکڑی گئی تھیں تاہم اس وقت بھی ٹرانسپورٹرز کو معاوضہ نہیں دیا گیا۔ ان کا مطالبہ تھا کہ لوڈ گاڑیوں کو فوری طور پر ریلیز کیا جائے اورجن دنوں کے لیے گاڑیاں رکی رہیں ان کا یومیہ 20 ہزار روپے معاوضہ ادا کیا جائے۔ انہوں نے گاڑیوں کے ڈرائیوروں کو تحفظ اور بنیادی سہولیات فراہم کرنے پر بھی زور دیا۔

کمرشل گاڑیوں کو احتجاج اور دھرنے روکنے کے لیے استعمال کرنا، صدر کے مطابق، ناانصافی ہے۔ ان کا کہنا تھا کہ حکومت فوری طور پر گاڑیاں ریلیز کرے اور ٹرانسپورٹرز کو ریلیف فراہم کرے۔