کراچی: منگھوپیر اور سائٹ سپر ہائی وے میں مبینہ پولیس مقابلے، تین ملزمان زخمی حالت میں گرفتار

کراچی کے علاقے منگھوپیر اور سائٹ سپر ہائی وے میں مبینہ پولیس مقابلوں کے دوران تین ملزمان کو زخمی حالت میں گرفتار کیا گیا، جبکہ دو ملزمان فرار ہونے میں کامیاب ہوگئے۔ پولیس کے مطابق، ان مقابلوں میں دونوں طرف سے فائرنگ کا تبادلہ ہوا۔

ایس ایس پی ویسٹ طارق الٰہی مستوئی کے بیان کے مطابق منگھوپیر تھانے کی حدود میں اجتماع گاہ روڈ پر پولیس اور مسلح ملزمان کے درمیان مقابلہ ہوا۔ اس دوران دو موٹر سائیکل سوار ملزمان، حمزہ ولد مقبول اور ابرار ولد کامران، زخمی حالت میں پولیس کے ہاتھوں گرفتار ہوئے، جب کہ ان کا ایک ساتھی فرار ہوگیا۔

پولیس نے بتایا کہ گرفتار ملزمان کے قبضے سے دو غیر قانونی پستول، گولیاں، خول، موبائل فون اور نقدی برآمد کی گئی۔ گرفتار افراد کی استعمال شدہ موٹر سائیکل گلشن اقبال کے علاقے سے چوری شدہ نکلی۔ زخمی ملزمان کو طبی امداد کے لیے عباسی شہید اسپتال منتقل کر دیا گیا ہے جبکہ فرار ہونے والے ساتھی کی تلاش جاری ہے۔

دوسری جانب، تھانہ سائٹ سپر ہائی وے پولیس نے فقیرہ گوٹھ میں ملزمان کی موجودگی کی اطلاع پر کارروائی کی۔ ترجمان ایسٹ پولیس کے مطابق، پولیس کی آمد پر ملزمان نے فائرنگ کی، جس پر دونوں جانب سے گولیاں چلیں۔ اس کارروائی میں ایک ملزم، محمد حمزہ ولد عمر خان، زخمی حالت میں گرفتار ہوا جب کہ اس کا ساتھی فرار ہوگیا۔

پولیس کے مطابق، گرفتار ملزم کے قبضے سے غیر قانونی اسلحہ، گولیاں، موبائل فون، موٹر سائیکل اور نقدی برآمد ہوئی۔ زخمی ملزم کو طبی امداد کے لیے اسپتال منتقل کردیا گیا ہے جبکہ فرار ملزم کی تلاش جاری ہے۔ متعلقہ حکام گرفتار کیے گئے ملزمان کا سابقہ ریکارڈ بھی چیک کررہے ہیں۔