جماعت اسلامی نے وزیراعظم کی درخواست پر لانگ مارچ عارضی طور پر روکا

امیر جماعت اسلامی پاکستان، حافظ نعیم الرحمان نے اعلان کیا ہے کہ وزیر اعظم شہباز شریف کی درخواست پر جماعت اسلامی کا لانگ مارچ عارضی طور پر ملتان میں روک دیا گیا ہے۔

ملتان میں پریس کانفرنس کرتے ہوئے حافظ نعیم الرحمان نے بتایا کہ وزیر اعظم نے ان سے فون پر رابطہ کیا اور لانگ مارچ کو مؤخر کرنے کی درخواست کی تھی۔ حافظ نعیم کے مطابق، انہوں نے وزیر اعظم کو عوام کی مشکلات سے آگاہ کیا۔ وزیر اعظم نے یقین دہانی کروائی کہ وہ پاکستان واپسی پر جماعت اسلامی سے ملاقات کرکے عوام کو ریلیف دینے کے فیصلے کریں گے۔

حافظ نعیم الرحمان نے وضاحت کی کہ جماعت اسلامی احتجاج سے دستبردار نہیں ہوگی اور نہ ہی لانگ مارچ سے پیچھے ہٹے گی۔ تاہم، وہ وزیراعظم کو سننے کے لئے عارضی طور پر ملتان میں قیام کریں گے۔ ان کا کہنا تھا کہ جماعت اسلامی کا ایجنڈا صرف عوام کو ریلیف فراہم کرنا ہے۔

حافظ نعیم نے کہا کہ حکومت سے واضح اور تحریری یقین دہانی لی جائے گی اور جب تک وزیراعظم واپس آ کر بات چیت شروع نہیں کرتے، لانگ مارچ ملتان میں جاری رہے گا۔ حافظ نعیم کا مزید کہنا تھا کہ یہ حکومت کے پاس بات چیت کے لیے آخری موقع ہے اور پیٹرولیم لیوی ہر صورت ختم کرنا ہوگی۔

وزیر اعظم کے ترجمان کے مطابق، حافظ نعیم الرحمان اور شہباز شریف کے درمیان ٹیلی فونک رابطہ ہوا جس میں وزیراعظم نے جماعت اسلامی سے کہا کہ اسلام آباد میں دھرنا مؤخر کریں اور حکومت اس وقت کمزور اور متوسط طبقے کو پیٹرولیم مصنوعات پر ریلیف فراہم کرنے کی کوشش کر رہی ہے۔

امیر جماعت اسلامی نے وزیراعظم کی تجویز کو خوش آمدید کہا اور کہا کہ دھرنا موخر کرنے پر غور جاری ہے۔ دونوں رہنماؤں نے وزیراعظم کی واپسی کے بعد ملاقات اور مشاورت جاری رکھنے پر اتفاق کیا ہے۔