اسلام آباد میں پی ٹی آئی لانگ مارچ کی ممکنہ آمد: سیکیورٹی سخت، راستے بند

حکام نے اسلام آباد میں پاکستان تحریک انصاف کے ممکنہ لانگ مارچ کو روکنے کے لئے وسیع پیمانے پر سیکیورٹی انتظامات کیے ہیں۔ شہر میں مختلف مقامات پر کنٹینروں کی مدد سے راستے بند کر دیے گئے ہیں، جب کہ اسلام آباد کو خیبرپختونخوا سے ملانے والا پہاڑی راستہ بھی بند کر دیا گیا ہے۔ پولیس ذرائع کے مطابق مارگلہ کے پہاڑوں سے اترنے والی پگڈنڈیوں پر بھی پولیس نفری تعینات کرنے کا منصوبہ ہے۔

مارگلہ روڈ، سرینگر ہائی وے اور ایکسپریس ہائی وے کو جوڑنے والی سڑکیں بھی کنٹینروں سے سیل کر دی گئی ہیں۔ اس کے علاوہ 26 نمبر چونگی، فیض آباد اور ٹی چوک روات پر بھی کنٹینروں کی بڑی تعداد موجود ہے۔ این فائیو اٹک خورد پل پر سڑک پر نوک دار کیلوں کی پلیٹیں لگا دی گئی ہیں جس کے باعث گاڑیوں کی آمدورفت تقریباً ناممکن ہو گئی ہے۔ اٹک میں تیس ہزار سے زائد پولیس فورس تعینات ہے۔

پنجاب حکومت نے پنجاب اور خیبرپختونخوا کے درمیان آمدورفت کے راستے بھی کنٹینروں سے بند کیے ہیں، جس سے پشاور اور اسلام آباد ہوائی اڈوں سے بیرون ملک جانے والے مسافر اور ہسپتال جانے والے مریض مشکلات کا شکار ہو گئے ہیں۔ بعض مسافر اپنی پروازیں بھی نہیں پکڑ سکے۔

ادھر، آئی جی پنجاب راؤ عبد الکریم نے آر پی او راولپنڈی بابر سرفراز الپا کے ساتھ اٹک اور شہر کے مختلف مقامات پر سیکیورٹی انتظامات کا معائنہ کیا۔ انہوں نے موٹروے ایم ون، ہزارہ موٹروے، این فائیو، اور اٹک شہر کے اندر بلاکنگ پوائنٹس کا جائزہ لیا۔ ان کے ساتھ دیگر سینئر پولیس اور انتظامی افسران بھی موجود تھے۔

ادھر فیض آباد کے ہوٹلز، ریسٹورنٹس اور ہاسٹلز بند کر دیے گئے ہیں۔ پولیس کی ہدایت پر مالکان سے حلف نامے لئے جا رہے ہیں، جن میں گارنٹی دینا ہوگی کہ ان کی عمارتیں مکمل طور پر خالی ہیں۔ کل شام تک حلف نامہ نہ دینے والوں کے خلاف کارروائی کی ہدایت کی گئی ہے۔