وزیراعلیٰ خیبر پختونخوا بانی پی ٹی آئی کی بہنوں کی گرفتاری روکنے میں ناکام

وزیراعلیٰ خیبر پختونخوا سہیل آفریدی بانی پاکستان تحریک انصاف عمران خان کی بہنوں نورین نیازی اور عظمیٰ خان کی ممکنہ گرفتاری روکنے کیلئے رات گئے لاہور پہنچے تھے۔

سہیل آفریدی نے موٹر وے پر جاری کیے گئے اپنے ویڈیو پیغام میں کہا کہ انہیں اطلاع ملی ہے کہ نورین اور عظمیٰ بی بی کو گرفتار کیا جا رہا ہے، اسی لیے وہ لاہور روانہ ہوئے ہیں۔ انہوں نے مزید کہا کہ ملک کو طاقتور افراد غلط سمت میں لے جا رہے ہیں اور سابق وزیراعظم کے خاندان کے ساتھ نامناسب برتاؤ کیا جا رہا ہے۔

ان کا کہنا تھا کہ بانی چیئرمین کی بہن علیمہ خان کو پہلے ہی گرفتار کیا جا چکا ہے اور ان کے گھر پر چھاپے بھی مارے جا رہے ہیں۔ وزیراعلیٰ کے مطابق سفید کپڑوں میں افراد بینرز پھاڑ رہے ہیں اور کنونشن میں داخل ہو رہے ہیں جبکہ ایک صوبائی وزیر کو اغوا کرنے کی بھی کوشش کی گئی۔

سہیل آفریدی نے الزام عائد کیا کہ چادر اور چاردیواری کا تقدس پامال ہو رہا ہے اور آئین و قانون کے محافظ خود قانون کی خلاف ورزی کر رہے ہیں۔ انہوں نے کہا کہ پاکستان کو تقسیم کرنے کی کوششیں کی جا رہی ہیں اور اعلان کیا کہ ستائیس ستمبر کو پورے ملک میں عوام سڑکوں پر نکلیں گے۔

واضح رہے کہ پولیس نے رات گئے نورین نیازی اور عظمیٰ خان کو گرفتار کر لیا جبکہ علیمہ خان اس سے قبل ہی گرفتار ہو چکی تھیں۔